“Hitman” kaniadto ni Jaguar nadakpan
CEBU, Philippines - Gipasanginlang “hitman” kaniadto sa napatay nga gipasanginlang drug lord sa siyudad sa Sugbo Jeffrey “Jaguar” Diaz nadakpan sa kapolisan sa gihimong Oplan Double Barrel Alpha.
Ang mga sakop sa City Anti-Illegal Drug Special Operation Task Group nga gipangulohan ni Police Senior Inspector Narrolf Tan, City Intelligence Branch nga gipangulohan ni Police Chief Inspector Christopher Navida milusad og buwag nga operasyon.
Unang nasikop pinaagi sa buy-bust operation sa may Sitio Caduloy, Brgy. Tisa si Roselyn Navarro, 36, residente sa Tres de Abril, Brgy. Punta Princesa.
Sumala pa ni Tan, nakuha nila gikan kang Navarro ang duha ka medium, duha ka gagmay sa gituohang pinutos nga shabu nga motimbang og 10.68 gramos nga mobalor og hapit sa P130 mil lakip ang 500pesos nga buy-bust money.
Ikaduhang nasikop pinaagi sa warrant of arrest nga giisyu ni Judge James Stewart Ramon Himalaloan ug Judge Sylva Paderanga Aguirre kagahapon sa alas dos ang takna sa kaadlawon sa may Back Rubber, Basak San Nicolas mao si Joselito Tecson, 36, walay trabaho residente sa maong lugar.
Gikataho nga usa kini si Tecson sa mga sinaligang bata-bata ni Jaguar.
Sumala pa ni Tan, dul-an sa duha ka bulan ang ilang gihimo nga pagpaniid ni Tecson, human nalutsan og warrants may kalabutan sa kaso sa Section 5 ug Art 2 sa RA 9165 nga giisyu ni Himalaloan ug Unlawful Possession of Explosive and Incendiary Device sa RA 9165 ug Unlawful Possession of Firearms gikan ni Aguirre.
Gitug-an ni Tan, gipreparar na nila ang pagpasang-at og tukma nga kaso batok kang Navarro ug pagpresentar ni Tecson ngadto sa korte. (BANAT NEWS)
- Latest
