Duha ka babaye patay

CEBU, Philippines - Patay ang duha ka babayeng factory workers dihang ang multicab nga pasaheroan nga ilang giluwanan nabanggaan  sa gikasugat nga Ceres Bus gikan sa Dakbayan sa Sugbo sa paghidangat niini sa dalan Highway sa Brgy. Magay, Lungsod sa Compostela.

Si Senior Police Officer 2  Jaime  Marolena sa Compostela Police Station miila sa mga  biktima nga mao sila si  Jenny Aves, 26, taga Lungsod sa Tuburan ug  Michelle  Orio, 35, taga Lungsod sa Liloan.

Matud pa ni Marolena nga ang biktima gikan pa sa ilang gitrabahoang pabrika sa Brgy. Sabang, Dakbayan sa Danao sakay sa multicab nga pasaheroan padulong sa Dakbayan sa Sugbo nga gimaneho ni Conciso Digal Orosco, 58.

Ang Ceres Bus nga nagdala sa Body number nga 8897 gimaneho sa drayber nga si Santiago Maxilom, 30 , taga Brgy Pajo, Lungsod sa Tabuelan gikan pa sa Dakbayan sa Sugbo paingon sa amihanang kalungsoran.

Matud pa nga kalit lang mi-overtake ang maong bus sa gisundan nga sakyanan, apan wala kini makabantay nga sa pikas nga lane ug sa paglikay niini naigo sa bus ang luyong bahin sa multicab sa mga biktima diin sila naglingkod.

Tungod sa kakusog sa pagbanggga ang duha ka biktima nga nag-atbang sa paglingkod nangabunal hinungdan sa ilang kamatayon.

Si Marolena miingon nga ang drayber  sa bus nga  si Maxilom wala nila maabti diha sa nahitaboan ug gituohan nga niikyas kini og dalidali tungod sa kahadlok.

Sa laing bahin, pabilin nga giatiman sud sa tambalanan ang 9-anyos nga batang lalaki nga nadumbolan sa usa ka mini bus diha sa Pitalo, San Fernando.

Ang biktima mao si Joshua Baloro, 9 anyos,tinun-an sa Pitalo Elementary School.  Samtang ang nakadam-ag mao si Victor Bayate, 41.

Nag-trending ang hulagway ni Baloro nga walay panimuot human kini na-post sa social media nga nanawagan kung kinsa nakaila sa mga ginikanan niini nga kini nabanggaan.

Matud pa ni Police Officer 1 Ronilo Lagtapi, padulong mouli ang bata sa ilang balay gikan sa tulonghaan sa dihang nadasmagan kini sa usa ka motor apan ang nakabangga daling nisibat, ang bata nalagpot ug didto kini naigo sa mini bus nga nahiagi sa lugar. Sumala pa ni Lagtapi, human sa aksidente nidiretso ang mini bus sa police station tungod sa kahadlok sa seguridad niini.

Dugang pa ni Lagtapi, nagkasabot ra ang matag habig bahin sa gastos sa bata hinungdan nga gibuhian ra usab si Bayate. (BANAT NEWS)