‘Masa Masid’ gilusad sa unang distrito

CEBU, Philippines - Mokabat sa 500 ka tawo ang nitambong sa Mamamayan Ayaw sa Anomaliya, Mamamayan Ayaw sa Ilegal nga Droga o Masa Masid program nga gipahigayon sa gym sa Lagtang, Dakbayan sa Talisay kagahapon sa buntag.

Ang kalihukan gipasiugdahan sa Department of Interior and Local Government nga gitambungan sa taga Lungsod sa Minglanilla, San Fernando, Sibonga, Dakbayan sa Naga ug Carcar diin ang nangulo ang kapolisan sa Dakbayan sa Talisay.

Si Bise Mayor Alan Bucao sa Dakbayan sa Talisay maoy nangulo sa mga representante sa siyudad uban sa mga barangay tanod ug mga opisyal sa 22 ka barangay.

Ang Masa Masid programa alang sa komunidad nga maoy nagdasig kanila sa pakigbatok sa tanang matang sa kriminalidad ug ilegal nga drugas lakip na ang korupsiyon.

Gani gipahibawo sab ang tanan sa ilang mga responsibilidad lakip ang ilang pagka-aktibo sa pakig-abag sa kapolisan sa ilang lugar.

Matud sa hepe sa kapolisan sa Siyudad sa Talisay, Supt. Aileen Recla, nga daku og tabang ang maong kalihukan kay ang katawhan man ang nasuhito sa ilang mga lugar ug kun si kinsa sab nga mga tawhana ang naghimo og ilegal nga kalihukan.

Siya nagkanayon nga walay laing buhaton ang komunidad kun dili ang paghatag lang og impormasyon kanila sa mga tawo o ilang silingan nga nagpahigayon og ilegal nga  kalihukan.

Si Chief Supt. Noli Taliño, direktor sa Police Regional Office-7, niingon nga dili angay mahadlok ang katawhan nga mohatag og impormasyon sa ilang seguridad tungod kay magpabilin kini nga confidential. (BANAT NEWS)