Minor sikop sa drug raid

CEBU, Philippines - Mokabat sa P200 mil nga kantidad sa gituohang shabu ang nasakmit sa mga sakop sa Criminal Investigation and Detection Group-7 ala una kagahapon sa hapon atol sa pagpangronda sa Lawis, Pasil, Dakbayan sa Sugbo.

Lima ka tawo ang nadakpan nga naglakip sa usa sa mga target sa mga polis nga si Juanita Casas, 68-anyos.

Lakip sa nasikop ang 16-anyos ug kauban niini nga sila si Flor Cabanday Dizon, 35; Eduardo Flores Baylosis, 35 ug Victor dela Torres Dadula, 35.

Ang mga sakop sa CIDG-7 nga gipangulohan ni Supt. Fermin Armendarez nihimo sa pagpangronda human sa buy-bust operation.

Si Casas suway unta nga nidagan paingon sa sulod sa balay hangtud nga nahitabo ang ginukdanay.

Sa sulod sa iyang balay nasikop ang laing upat kauban ang minor de edad.

Matud pa nga igo lang hagbungan og drugas si Casas sa iyang supplier ug kini na ang mamaligya sa maong dapit.

 Narekober sa mga polis ang mga pinaketeng shabu nga kantidad og P200,000.

 Idlas nasikop

Sa laing bahin, notadong kaliwat sa tigpayuhot og ilegal nga drugas ang nasikop sa kapolisan sa Dakbayan sa Talisay sa Sitio Tunga, Barangay Tanke niadtong Huwebes sa hapon.

Ang dinakpan mao si Ronald Bazar, 60-anyos, nagpuyo sa nahisgutang lugar kinsa nakuhaan og duha ka dagku ug medium pack sa shabu.

Matud ni Supt. Aileen Recla, hepe sa Talisay City Police Station, nga dugay na nga ang apilyedong Bazar anaa sa ilang listahan gumikan sa ilegal nga kalihukan.

Siya nagkanayon nga ang ilang nasikop nga Bazar mao ang supplier og shabu nga ilang gihulagway nga idlas.

Gipatrabaho

Gihatagan og higayon sa kagamhanan sa Dakbayan sa Lapu-Lapu ang 17 ka “drug surrenderers” nga makatrabaho.

Matud ni Mayor Paz Radaza nga ang 17 kabuok ang gikatakdang magsugod isip job order personnel sa City Hall tungod kay na-obserbahan kini niya nga naningkamot alang sa kausaban ug mapalayo sa ginadiling drugas.

Mao kini ang nahabilin sa 1,700 ka “drug surrenderers” nga natala sa siyudad nga matud ni Radaza sagad kanila wala nipadayon sa gilusad nga intervention program kuyog sa Lapu-Lapu City Police Office.

Ang 17 ka “surrenderers” ibutang sa Material Recovery Facility sa siyudad sa Barangay Mactan.

Karong adlawa moadto si Radaza sa Isla sa Olango aron makig-estorya sa 400 ka drug surrenderers sa walo     ka barangay sa maong isla.

Tumong niya ang paghatag usab og trabaho sa mga drug surrenderers nga nagpuyo sa isla pinaagi sa gardening ug coastal cleaning.

Sa niaging pipila ka buwan, nipahigayon og programa ang siyudad ug LLCPO batok sa ilegal nga drugas diin ang mga tawo nga nitahan gipaubos og group therapy ug zumba. (BANAT NEWS)