Igmi mosud karong adlawa

CEBU, Philippines - Adunay bagyo nga gipaabot mosulod sa Philippine Area of responsibility (PAR) karong adlawa sumala pa sa Pagasa.

Matud ni Engr.  Al Quiblat ang OIC sa Pag-Asa Mactan nga ang bagyong Chaba kun mosulod kini sa PAR karon tawagon kining bagyong Igmi, kini ang ikasiyam nga bagyo nga mosulod sa nasod human sa bagyong Helen.

Hinoon matud ni Quiblat nga wala kaayo’y epekto ang maong bagyo sa Pilipinas tungod ang direksyon niini padulong sa Southern Japan. Si Quiblat nagkanayon nga ang bagyong Igmi gikatakda nga mogawas sa nasod inig Lunes.

Human sa Igmi adunay laing bagyo nga gipaabot nga mosulod sa PAR,  sa Martes ug tawagon kini Julian. Si Quiblat nagkanayon nga ang nasinating pag-ulan sa miaging gabii epekto kini sa Habagat.

Matud ni Quiblat nga sugod kagahapon hangtod Domingo makasinati ang Sugbo og pat-ak pat-ak nga pag-ulan nunot kini sa umaabot nga bagyo.

"Starting now (yesterday) up to weekend Sunday we will be experiencing partly cloudy to cloudy skies with high chance of thunderstorm occurrence particularly in the afternoon and evening.  However on Monday and Tuesday we have this forecast that high to moderate rain will be experienced," matud ni Quiblat. (BANAT NEWS)