Drayber gipatay sa guwardiyang hubog

CEBU, Philippines - Milapos sa ulo ang bala hinungdan nga nakabsan sa kinabuhi ang usa ka drayber sa garbage truck human kini gipusil sa guwardiya sa Ramos Public Market sa Brgy. Cogon-Ramos pasado alas 4 kagahapon sa kadlawon.

Ang biktima giila nga si Nestor Pasilang taga Brgy. Zapatera, samtang ang guwardiyang namusil mao si Jeremias Daniel sakop sa GDS Security Agency.

Matud ni PO3 Cristobal Geronimo, imbestigador sa CCPO-Homicide Section nga sa wala pa nahitabo ang pagpamusil, nagkalalis na ang duha dihang gipangutana ni Pasilang ang guwardiya kun nganong dugay mangabri sa merkado.

Dugang ni Geronimo nga gawas nga drayber sa garbage truck si Pasilang nagtabang-tabang sab kini sa pagbantay og pagplastar sa mga baligya nga utanon sa iyang uyoan.

Human sa lalis, nilakaw ang biktima ug gisundan sa guwardiya nga naghawid na daan sa iyang revolver. Giingnan pa sa biktima ang guwardiya nga “ayaw ana guard kay maigo ta ana” apan gibunot sa guwardiya ang iyang .38 revolver dayon pusil sa nawong sa biktima nga milapos sa ulo.

Human sa hitabo yano ra sab kaayong nilakaw ug nisibat ang suspek.

Sigon pa ni Geronimo nga basi sa impormasyon nga nakuha nila sa dapit, ilang nahibaw-an nga hubog nga ni-duty niadtong nakalabay nga gabii ang guwardiya ug gani nagpabuto pa kini sa iyang armas apan walay nitug-an sa polis.

Matud niini nga kun unta natug-an pa sa polis ang pagpasalba sa maong guwardiya lagmit dili na kini makapamusil pa ug nadakpan na unta.

Nakig-alayon na karon ang kapolisan sa security agency nga gitrabahoan sa suspek ug hangtod karon padayon pa kining gipangita. (BANAT NEWS)