Drug pusher nga misukol sa kapolisan napatay
CEBU, Philippines - Napatay atol sa buy-bust operation sa kapolisan ang pag-umangkon ni Mandaue City Councilor Carmelino Delmar Jr.
Si SPO2 Renato Canja sa Presinto 1 sa Mandaue City Police Office (MCPO) miingon nga si Elvin Delmar Sison, nagpuyo sa Ibabao-Estancia, Mandaue misukol sa mga polis.
Gironda sa kapolisan ang panimalay ni Sison base sa search warrant nga giisyu ni RTC Judge Mercedita Dadole-Ignacio apan dali kining nikuha og armas ug gipamusil ang mga polis.
Si PO1 Ryan Heyrosa nga maoy nag-una sa iyang kaubanan naigo sa tiil hinungdan nga abtik kining mibawos pagpusil ngadto ni Sison. Ang mga doktor sa Mandaue City Hospital mideklarar nga patay na kini pag-abot.
Matud ni SPO2 Canja nga ang mga polis nakasakmit og 27 ka gagmay’ng pakete sa shabu, upat ka medium-size pack sa shabu ug ang 9 milimeter nga pistola ug mga bala, ingon man mga drug paraphernalia.
Ang mga ebidensya gipadala ngadto sa PNP Crime Laboratory aron mahimoan og pakisusi.
Si SPO2 Canja miingon nga si Sison nalakip sa watchlist sa mga drug personalities sa MCPO ug nalakip kini nga gi-tukhang apan nagdumili pagtahan ngadto sa ilang buhatan.
Samtang nasikop sa kapolisan ang lima ka suspetsadong drug pusher, nga naglakip sa amahan ug anak ingon man ang usa ka babaye, atol sa buy- bust operation didto sa Sitio Camolinas, Poblacion, Cordova.
Matud ni PO2 Vilma Degamo sa Cordova Police Station nga target sa ilang operation mao si Liberty Anteporta Obregon, 36, minyo nga nagpuyo sa maong dapit.
Apan gawas ni Obregon, nadakpan usab ang lima ka kauban niini nga sila si Jose Wilson Degamo Sr., 50, ang iyang anak nga si Jose Wilson Junior, 30, ug ang laing tulo nga si Ricardo Sitoy, Mario Rolando Degamo, 48, ug Jovic Henrick Degamo, 28, pulos nagpuyo sa Sitio Camolinas. Nasakmit gikan sa mga suspetsado ang 36 ka gagmay’ng pakete sa shabu, usa ka medium-size nga pakete sa shabu, mga drug paraphernalia ug P450 nga buy-bust money.
Si PO2 Degamo miingon nga ang operation gipangulohan sa ilang hepe nga si Senior Inspector Jomar Medel.
Dugang pa ni PO2 Degamo nga ang maong mga dinakpan nalakip kini sa Oplan Tukhang nga ilang gihimo apan wala mo-surrender sa police station. (BANAT NEWS)
- Latest
