67 na patay sa dengue sa Sugbo
CEBU, Philippines - Labing ulahing namatay sa dengue sa Sugbo ang batang lalaki niadtong Septiyembre 10 sa Lungsod sa Consolacion. Kini ang ika-67 nga namatay sa unang walo ka buwan karong tuiga sa tibuok probinsiya lakip na sa Dakbayan sa Sugbo, Mandaue ug Lapu-Lapu.
Nag-unang lima ka lugar nga may labing daghang kaso sa dengue ang Dakbayan sa Sugbo, Mandaue, Toledo, Lungsod sa Balamban ug Dakbayan sa Lapu-Lapu.
Matud ni Dr. Rene Catan, pangulo sa Provincial Health Office, nga ilang gihimo karon ang pagkontrol sa pagsaka sa kaso sa dengue ug nag-umol usab sila og Task Force Kontra Lamok.
Samtang ang mga rural health units sa kalungsuran ug mga component cities sa probinsiya ang giawhag sa Provincial Board sa pagduso kanunay og updated report sa mga kaso sa dengue sa ilang lugar ngadto sa PHO.
Sila si Bokal Jose Mari Salvador ug Bokal Christopher Baricuatro nagkanayon nga sa pagsaka sa gidaghanon sa kaso sa dengue kinahanglan nga palig-onon pa ang anti-dengue awareness program sa kagamhanan.
Nunot usab sa ulahing kaso sa Zika virus sa Sugbo diin usa ka mabdos ang nataptan niini, giawhag usab ni Bokal Miguel Antonio Magpale ang publiko ilabi na ang mga mabdos nga magmabinantayon tungod kay moresulta kini sa microcephaly o deperensiya sa utok sa bata nga gisabak. (BANAT NEWS)
- Latest
