‘Jaggy Diaz’ tusak sa iyang armas

CEBU, Philippines - Patay diha-diha ang usa ka lalaki nga nagdala og KG-9 sub-machine pistol human gipusil sa wala mailhing gunman sa Katipunan Street, Labangon, Dakbayan sa Sugbo pasado alas 12 sa nakalabay nga kadlawon.

Hangtud karon padayon pa nga giila sa mga polis ang pangalan sa biktima nga adunay tattoo sa dughan nga “Jaggy Diaz”.

Sumala pa ni Police Officer 3 Winston Ybañez, imbestigador sa homicide section sa Cebu City Police Office, nga samtang naglakaw ang maong lalaki kalit gisundan kini sa gunman nga nagtago sa ngitngit nga bahin ug gipusil.

Matud pa sa mga nakakita nga nisuway pa unta og dagan ang biktima ug nibunot sa iyang dala nga armas nga gisulod sa bag apan dihang kini nibawos sa pagpusil nikagar ang iyang KG-9.

Dihang natumba ang biktima gikuha sa gunman ang iyang armas ug maoy girapido sa lawas niini hangtud namatay.

Sa crime scene narekober sa mga polis ang pito ka basiyo sa bala sa .9mm pistol ug siyam ka bala sa KG-9 sub-machine pistol.

Si Ybañez niingon nga dili pa sila makatug-an kung unsay kahulugan sa tattoo sa namatay ingon nga dili pa sila makatug-an kung kini konektado ba sa grupo ni anhing Jaguar Diaz.

Dako ang pagduda ni Ybañez nga lagmit gisundan nang daan sa iyang kontra ang biktima ug kini giatangan paglabay sa maong dapit.

Ang kapolisan padayon pa nga nangita og dugang impormasyon sa kamatayon sa biktima ug nganong nagdala sab kini og de kalibre nga armas. (BANAT NEWS)