P10 nga terminal fee sa CSBT lalisan

CEBU, Philippines - Gilalisan ang P10 nga terminal fee sa Cebu South Bus Terminal (CSBT) tali sa drayber ug pasahero sa taxi kung kinsa kanila ang obligado nga mobayad.

Ang operations manager sa terminal nga si Joey Herrera nagkanayon nga obligasyon gyud unta sa drayber ang pagbayad sa P10 ilabi na kadtong molinya sa taxi stand ug mo-pick up og pasahero sulod sa terminal.

Matud ni Herrera nga kung ang pasahero wala kini karga pwede kining anha lang manaug sa gate sa terminal ug molakaw lang paingon sa sulod.

Apan kung aduna kini karga makigsabot na lang sa drayber nga magpasulod ug siya na ang mobayad sa P10 nga terminal fee.

Giklaro usab ni Herrera nga kadtong mga taxi nga magpakanaug og pasahero sa terminal ug kung maka-pick up og pasahero sa sulod dili na kini paninglan og laing P10.

Apan kadtong taxi nga mosulod lang sa terminal aron mopasakay og pasahero pabayron gyud kini og P10 inig gawas.

Sa laing bahin, si Herrera nagkanayon nga ang kita sa terminal sukad sa buwan sa Enero hangtud sa Agosto nilabaw na og P1.2 milyones sa kita sa susamang mga buwan sa niaging tuig.

Ang maong kita naggikan sa P150 nga terminal fee sa matag bus, P10 nga entrance fee sa mga taxi ug P5 nga bayad sa mga mogamit sa pansayan.

Sa tibuok tuig sa 2015 nikabat ngadto sa P69 milyones ang kita sa CSBT ug niining tuiga ang target collection sa terminal sobra sa P70 milyones.

Ang kahuot tungod sa kadaghan sa pasahero maoy usa sa mga problema karon sa terminal.

Matud usab ni Herrera nga matag-weekend moabot ngadto sa 630 ang biyahe sa mga bus ug ang gidaghanon sa pasahero moabot usab ngadto sa 26,000.

Sa week days o gikan sa Lunes hangtud sa Biyernes moabot ngadto sa 20,000 ang gidaghanon sa pasahero.

Dugang ni Herrera nga ang kapasidad nga maokupar sa terminal mao ang 500 lang ka pasahero. (BANAT NEWS)