Upat tipi sa pagpamusil
CEBU, Philippines - Tulo ang patay sa managlahi nga pagpamusil sa Dakbayan sa Sugbo ug tulo sa mga suspek sa pagpamusil sa 14-anyos nga bata sa Brgy. Pasil, nitahan sa ilang kaugalingon.
Patay ang ig-agaw ni Rowen “Yawa” Secretaria nga si Rolando Secretaria human matud pa nisukol sa mga sakop sa kapulisan nga nag follow-up sa pagpusil patay sa 14-anyos niadtong adlaw nga Biyernes diha sa Brgy. Pasil.
Ang operasyon pinangulohan ni Police Chief Inspector Keith Allen Andaya batok sa grupo ni Rolando apan nisukol kini ug napusilan. Nakuha gikan kaniya ang nagkadaiyang klase sa mga armas, bala, ug mga pinutos nga shabu. Matud pa nga aduna usab standing warrant si Rolando sa kaso gihapon sa ilegal nga drugas.
Nitahan usab ang tulo ka mga lalaki apil ilang mga armas nga naglakip sa igsuon ni Rowen nga si Michael Secretaria, 32, Gerald Flores, 20, ug Dario Abanto, 18, nga giingong kauban pagpusil sa batan-on.
Samtang patay usab diha sa 5th Street R. Padilla, Brgy. Duljo-Fatima ang usa ka Edgar Altobar, 19, taga Brgy. Tisa. Wa pa mailhi kun kinsa ang nipusil sa biktima.
Ang ikatulong pagpamusil nahitabo sa may Enriquez Compound, Brgy. Punta Princesa diin usa ka Mirasol Aleonar, 39, ang nakabsan sa kinabuhi human gipusil sa wala pa mailhing mamumuno samtang kini nagpaabot sa iyang sinagop nga nagtungha.
Sa Mandaue City, patay si Dave Mark Velasquez, 39, taga Lower Camanggahan , Brgy. Tabok kinsa gipasanginlang nalambigit sa ilegal nga drugas human gipusil sa duha ka mga lalaking nagmotor. (BANAT NEWS)
- Latest
