Motor nisampak sa trak, 17-anyos patay

CEBU, Philippines - Patay ang 17-anyos nga motorista dihang nadasmagan sa gikasugat nga trak de karga sa Barangay Laaw, Lungsod sa Borbon alas 7 pasado sa buntag sa niaging adlaw.

Si Police Officer 3 Owen Codilla Baticuang sa Borbon Police Station niila sa biktima nga si Joseper Moncada Branola, taga Barangay Poblacion sa nahisgutang lungsod ug ang nakadasmag nga trak gimaneho ni Eduardo Obligado Amante, 40-anyos, taga Lungsod sa Catmon.

Matud ni Baticuang nga nagdagan paingon sa Lungsod sa Catmon ang trak ug ang motorsiklo nga gidala sa biktima ang gikasugat niini ug giingong ni-overtake kini sa laing sakyanan nga nakaingon sa maong panagdasmag.

Dugang pa ni Baticuang nga tungod sa kusog nga impact sa panagdasmag nalamba sa karsada ang biktima nga nakaingon sa grabeng kadaut nga naangkon sa iyang kalawasan. Gidala sa Juan Dosado Memorial Hospital sa Damulog, Lungsod sa Sogod ang biktima apan gideklarar kini sa doktor sa maong tambalanan nga dead on arrival.

Si Amante nitahan sa kapolisan human sa maong hitabo ug temporaryong gitanggong samtang gipaabot pa nila ang mga kabanay sa biktima alang sa tukmang lakang nga ilang pagahimoon. (BANAT NEWS)