Bata, hamtong gipatay

CEBU, Philippines - Duha ang patay lakip ang usa ka bata sa pagpamusil sa managlahi nga barangay sa Dakbayan sa Sugbo sa nilabay nga gabii.

Unang pagpamusil nahitabo alas-4 pasado sa hapon niadtong Biyernes diha sa sudlonong bahin sa Ermita Proper sa Brgy. Ermita diin usa ka Joblet Lariosa, 30, ang gipusil sa wala mailhing tawo.

Matud pa ni Police Officer 3 Enrico Quirante, sa Homicide Section sa Cebu City Police Office naglakaw pasulod sa maong lugar ang biktima sa dihang kalit kining gipusil sa wala mailhing tawo gikan sa iyang luyo.

Dali nga gidala sa mga barangay tanod ang biktima diha sa Cebu City Medical Center apan pipila ka gutlo ang milabay nakutloan kini sa iyang kinabuhi.

Padayon pang gisubay karon ang motibo sa pagpatay sa biktima.

Ang ikaduhang pagpamusil nahitabo alas-3 sa kaadlawon kagahapon diha usab sa sudlonong bahin sa Sitio Lawis, Brgy. Pasil diin usa ka John Karl Diada, 14, taga C. Padilla, Brgy. Duljo Fatima ug tinun-an sa second year high school ang gipusil sa tulo ka wala mailhing tawo.

Matud pa ni Senior Police Officer 4 Reynaldo Origines sa Sawang Calero Police Station, dunay kaestorya ang biktima sa maong lugar sa dihang kalit kining gipusil sa makadaghan nga higayon sa wala pa matino nga hinungdan.

Dali nga gidala sa Cebu City Medical Center ang biktima apan gideklarar sa mga doktor nga patay na.

Ang Homicide Section mao nay nipadayon sa paghimo sa imbestigasyon apan usa sa ilang gisubay nga posibleng motibo mao nga adunay kaatraso ang biktima sa maong dapit, nasuta usab nga walay criminal record sa ilang buhatan ang maong bayongbayong. (BANAT NEWS)