Kurapsyon sa Cebu City Zoo

CEBU, Philippines - “Haven of Corruption” maoy paghulagway ni Cebu City Mayor Tomas Osmeña sa Cebu City Zoo human masayod sa matud pa mga anomalosong transaksiyon sa zoo. Gumikan usab sa sitwasyon sa zoo gitudlo niya si Dr. Alice Utlang ang pangulo sa Department of Veterinary Medicine and Fisheries (DVMF) isip Officer-in-Charge sa Cebu City Zoo. Sa pagtudlo niya kang Utlang, usa sa gihimo niini ang pagpahigayon og inventory sa mga kahayupan sa zoo nga kaniadto ubos sa landong sa DVMF apan gibalhin sa Office of the Mayor. Matud ni Dr. Utlang, ang gihatag nga inventory sa mga kahayupan anaa sa 278 apan sa ilang pakisusi nahibaw-an nga dili na mao ang ihap sa mga mananap. Gawas niini, gipasusi sab niya ang income sa zoo aron mahibaw-an kun asa padulong ang bayad sa snake massage dungan sa pagbutyag nga gidili ang pagbutang og hayop sa zoo nga gipanag-iya og pribadong tawo ug ang gobiyerno maoy nagpakaon niini. Kun adunay i-donate nga mananap, kinahanglan dokumentado kini ug adunay Memoramdum of Understanding.

Namatikdan sab ni Utlang nga gipaburot ang presyo sa mga pagkaon alang sa mga hayop sama sa saging nga tag P15 ang buok.

Nasayran nga anaa sa P3.1 milyones ang budget sa zoo alang sa pagkaon. Tungod niini adunay i-rekomendar si Utlang kang Osmeña sama sa ang mga langgam maoy ipabilin kay dili kini gasto ug dili kalas og pagkaon.

Gihulagway ni Mayor Osmeña nga ang nahitabo sa zoo nagpamatuod nga giusik-usikan lang ang kwarta sa siyudad ug gihimong gatasan sa mga kurap. Nasayran nga nagplano ang mayor nga himoong aviary ang Compaña Maritima subay sa iyang tinguha nga sirad-an ang zoo. Samtang ang ubang mga mananap posibleng i-donate sa Amlan, Negros Oriental. Ang kadagkuan sa Cebu Port Authority (CPA) walay pagsupak sa plano sa mayor gani suportado nila kini. (BANAT NEWS)