Mayoriya tumong sa BOPK – Alcover

CEBU, Philippines - Nipasangil si Konsehal Pastor “Jun” Alcover kang Cebu City Mayor Tomas Osmeña nga gihinay-hinay og kombinser ang mga konsehal sa Team Rama nga motapon sa Bando Osmeña Pundok Kauswagan (BOPK) aron mahimong majority bloc sa konseho.

Nagkanayon si Alcover nga ang kampo sa BOPK dunay gitawag nga Operation October diin matud pa tinguha ni Osmeña nga makuha ang majority sa konseho sa dili pa ang buwan sa Oktubre.

Gihulawagy sa konsehal nga duha ang tumong ni Osmeña diin ang una kung makakuha ang BOPK og tulo ka konsehal sa Team Rama sila maoy mahimong majority bloc ug maoy mokontrolar sa City Hall.

Dugang niini nga kung matuman ang maong plano dunay posibilidad nga mahitabo nga ilang ibaligya ang South Road Properties (SRP) ug matud pa mahimong lawgawon sa pikas kampo ang budget kay wala nay mosupak.

Nasayran nga unang nibiya sa Team Rama si Konsehal Dave Tumulak kinsa nag-independente karon ug bag-ohay lang nisibaw ang ngalan ni Konsehal Nendell Hanz Abella nga mobalhin sab sa BOPK.

Gipasabot ni Alcover nga ang mga kauban niya nga mga konsehal sa Team Rama dunay mga kaagi sa BOPK dungan sa pagbutyag nga ang pag-ambak sa pikas matawag nga political survival.

Nanghinaut ang konsehal nga dili na madungagan pa ang mga konsehal nga mobiya sa Team Rama ilabi na nga upat ka ngalan ang nitumaw nga motapon sa pikas apan gitataw niini nga kung ang tawo oportunista motraydor gyud.

Giangkon ni Alcover nga nasakitan ang ilang grupo sa gihimo ni Tumulak ug Abella kini bisan og wala pay kompirmasyon tungod kay matud pa nihural pa ang duha atubangan nila ug sa mga kapitan nga dili mobiya sa Team Rama apan nahitabo na lang kini nga wala magpahibawo ug mohatag man lang og timailhan nga sila mobiya.

Apan si Osmeña dihang gipangutana labot sa alegasyon ni Alcover igo lang nikatawa ug niingon nga nahitabo usab kini sa niaging administrasyon diin daghang mga sakop sa BOPK ang nitapon sa Team Rama.

Tungod kay si kanhi mayor Michael Rama wala may kadaganan gihulagway ni Osmeña si Rama nga daw sa iyang gibugaw ang iyang mga miyembro sa partido ngadto sa PDP-Laban aron dunay maduolan ug madaganan.

Gani nagtuo sab ang mayor nga sa dili madugay biyaan ra sab ni Bise Mayor Edgardo Labella si Rama sama sa gibuhat sa ubang mga konsehal. (BANAT NEWS)