Luna ihatag sa buhatan sa Ombudsman
CEBU, Philippines - Gitugtan sa hunta probinsyal si Gobernador Hilario Davide III nga modonar og yuta nga gipanag-iya sa Kapitolyo ngadto sa Office of the Ombudsman Visayas.
Sa resolusyon nga gipangamahanan ni Bokal Jude Thaddeus Sybico nga aprubado sa provincial board, gihatagan niini og otoridad si Davide nga mopirma og deed of donation alang sa yuta nga Lot 6033-B-2 nga anaa nahimutang sa DA Compound sa M. Velez sa dakbayan sa Sugbo.
Ang kasamtangang buhatan karon sa Office of the Ombudsman anaa natukod sa gihatag usab nga luna sa Kapitolyo ug ang maong building adjacent sa bag-ong yuta nga ihatag.
Gisaysay sa maong resolusyon nga ang Ombudsman nihangyo sa Probinsya sa Sugbo og dugang luna aron malapdan pa ang ilang buhatan.
Nisanong ang provincial board niini aron makabaton og dugang espasyo ang Ombudsman Visayas aron sila mahimong mas accessible sa katawhan. (BANAT NEWS)
- Latest
