15 sikop sa managlahing drug bust

CEBU, Philippines - Kinse ka tawo ang nangadakpan sa buwag nga mga operasyon kontra illegal nga drugas nga gihimo sa kapolisan.

 Pito ka mga tawo ang nadakpan sa mga sakop sa San Fernando Police atol sa ilang gihimo nga drug bust operation diha sa Sitio Lacaron, Brgy. Pitalo sa Lungsod sa San Fernando sa nakalabay nga kaadlawon. Ang maong operasyon gipangulohan sa hepe sa San Fernando Police, Sr. Insp. Diosdado Malazarte diin kauban sab nila ang mga sakop sa Special Weapons and Tactics ug Regional Public Safety Battalion-7.

Lakip sa pito nga mga nadakpan mao ang target sa kapulisan nga si Junry Montoya, 36, nga nakuhaan og usa ka pakete sa gituohang shabu ug .38 revolver nga dunay lima ka mga bala.

Apil sa mga nadakpan sila si John Michael Bayno, 19, nakuhaan og duha ka pakete sa gituohang shabu, Rommel Timtim, 18, usa ka pakete sa shabu, Norberto Jabonillo, 34, usa ka pakete sa shabu, Celestino Ubay Jr., 30, nakuhaan og usa ka .45 caliber pistol ug 45 ka pakete sa gituohang shabu, ug usa ka .357 revolver nga dunay tulo ka bala; Jiovanne Caraca, 27, nakuhaan og mga drug paraphernalia, ug Junly Alce, 22, usa ka pakete sa shabu.

Nasayran nga gihimo sa kapulisan ang pagronda sa maong dapit human dunay nisumbong nga namaligya og drugas sa lugar si Montoya.

Samtang walo ka tawo, duha niini ang nalakip sa police watchlist ang gidakop sa gipahigayon nga managlahing buy-bust operation sa Dakbayan sa Lapu-Lapu sulod sa duha ka adlaw.

Nasikop sa Lapu-Lapu City Police Office- City Intelligence Branch ang manag-agaw nga silang Rommel Aton Tapao, 39, ug Joseph Aton Andales, 30, diha sa Sitio Marbeach sa alas 3:15 sa hapon sa miaging Biyernes. Nagkanayon si Chief Inspector Mark Giftet Sucalit, hepe sa LCPO- CIB nga si Andales ug Tapao, pulos anaa sa drug personality watchlist sa Marigondon Police Station.

Nadakpan usab niadtong Sabado silang John Mark Lucena, 38, ug Arvic Ramas, 37, diha sa Hangar Road, sa Brgy. Basak ug nakuha kanila ang 12 ka gagmay’ng putos nga shabu , P300 nga buy-bust money ug P570 nga gituohang halin sa illegal nga  drugas gikan kang Lucena. Nadakpan usab sa Pusok Police Station silang Fernando Inso, 42; Derick Manansala, 27; Nestor Sanchez, 48; ug Patrick Solitario, 35, diha sa Sitio Ihawan sa Brgy. Pusok.

Matud ni Police Chief Inspector Wayne Magbanua, hepe sa Pusok Police Station nga si Inso ang main subject sa operasyon nga nagpuyo sa Merkado sa Brgy. Basak ug si Manansala, lumad nga taga Kanhabagat, Medellin, Cebu. Napulo ka paketeng shabu ang nakuha gikan sa duha.

Gawas sa duha naaktohan usab sila Solitatio ug Sanchez nga nanuyop sa drug den sa lugar nga nakuhaan og mga drug paraphernalia.  (BANAT NEWS)