Polis nangulata

CEBU, Philippines - Usa ka intelligence officer sa Mandaue City Police Office ang girelibohan sa katungdanan human kini nag-viral sa social media kauban ang usa ka wala pa mailhing armadong lalaki nga nikulata sa drayber ug supervisor sa usa ka dakong aircon maintenance company.

Nahitabo kini niadtong Biyernes sa hapon atubangan sa usa ka pribadong eskuylahan sa tiilan sa Mandaue-Mactan Bridge sa A.C. Cortes Street, nakuhaan kini og video sa usa ka netizen diin makita nga gikulata sa maong polis ang drayber ug gi-headbutt pa ang kauban niini samtang ang kauban sa polis nga naka-sibilyan og sapot nagwara-wara og pistola bisan adunay mga bata nga nagtan-aw.

Ang mga mireklamo mao ang nagmaneho sa trak (GHD 466) nga si Crispen Ricarte, 25, kuyog sa supervisor niini nga si Leonardo Orcullo, 28, sa dihang  mi-overtake ang usa ka motorsiklo nga adunay plakang QC- 8143 nga gidrayban ni Police Officer 3 Renato Inot, 51, ug laing usa ka wala pa mailhing lalaking nagsuot og t-shirt nga orange ug nag-shorts apan armado og pistola.

Base sa video nga na- post sa Facebook si Inot nagsuot og itom nga t-shirt ug nag-sunglasses samtang padayon pang giila kadtong iyang kauban nga nakasuot og kolor orange kun polis ba kini tungod kay nagdala-dala man og armas.

Si Ricarte nagkanayon nga sa dihang naabot sila sa ubos nga bahin sa bridge duol sa UCLM nahunong sila tungod kay traffic apan nakurat siya kay gituparan sila og motorsiklo ug mikanaog si Inot gikan niini ug diretsong mihagit kaniya og sukmagay.

"Panaugon mi didto ngano kuno gibabag-babagan siya (Inot). Panaugon ko niya magsinumbagay daw mi, gitionan ko niya og armas," matud ni Ricarte.

Matud pa nga human siya gitionan ni Inot gipasa niini ang armas ngadto sa iyahang kaubang lalaki kinsa aduna say gidala nga armas, ug diha-diha gisumbag-sumbag ug gipatiran sa maong polis samtang naglingkod pa siya sa atubangan sa manobela  sa trak.

Nakaangkon og bun-og sa walang bahin sa mata si Ricarte. Si Orcullo, mipasangil usab nga gisumbag siya ni Inot apan nakalikay kini dayon. "Ingon ko, pwede ra man mi isyuhan kung naa mi (traffic) violation. Sila ni diretso og harass," matud ni Orcullo kinsa mibutyag nga hasta siya gitionan og armas sa duha.

Ang video paspas nga nag-viral sa social media nga adunay panawagan sa representante sa kompanya diin magtrabaho ang mga biktima aron sila tabangan pag-ila sa duha ka mga lalaking mipasipala sa ilang mga trabahante.

Bisan ang mga traffic enforcers sa Traffic Enforcement Agency of Mandaue (TEAM) nga nakita sa video gisaway usab sa netizens tungod kay wala sila makasanta sa maong polis.

Si Sr. Supt. Roberto Alanas, director sa MCPO mimando pagparelibo kang Inot ug paghimo og dugang imbestigasyon pag-ila kun kinsa kadtong armadong lalaki nga iyang kauban.

Miangkon si Alanas nga kagahapon lang sa buntag niya nahibaw-an ang maong insidente ug gani nakahibalo siyang adunay gilakaw nga trabaho si Inot sayo sa buntag. Iyang gitawgan si Inot apan wala na motubag kaniya.

Si Glenn Antigua, chief of operation sa Traffic Management Agency of Mandaue miingon nga ang iyang Traffic Enforcer nga si George Cadunggo nga nadestino sa dapit nangangkon iyang gisundan ang duha hangtud sa ParkMall  area apan pag-abot sa ngitngit nga bahin nakuyawan siyang mapusilan ug wala na mopadayon apan niradyo  kini sa Command Center kabahin sa mga armadong lalaki.

"Disarmahan, i-hold po siya dito sa Mandaue Police, harapin niya ‘to," matud ni Alanas kinsa miingon nga mahimong makasohan ang maong polis og physical injuries  ug mahimo usab nga grave threats.

Si Mandaue City Mayor Gabriel Luis Quisumbing mimando usab sa paghimo og imbestigasyon sa maong hitabo ug misaad nga motabang ang siyudad sa mga biktima.

“The offender will be investigated and immediately have his firearm withdrawn and placed on floating status pending the results of the investigation,” ni Mayor Quisumbing pa sa iyang pamahayag.

“City government will be reviewing their protocols for incidents that involve public safety… Expect improvements very soon. It may take time but mark my words, I will keep this city safe,” matud pa sa mayor sa iyang post sa Facebook.  (BANAT NEWS)