21 nasikop sa drug bust

CEBU, Philippines - Baynte uno ka tawo usa niini babaye ang nadakpan sa mga sakop sa Philippine Drug Enforcement Agency (PDEA)-7 ug kapolisan sa buwag nga mga operasyon niadtong adlaw nga Biyernes.

Matud ni Leia G. Albiar, public information officer sa PDEA-7 nga aduna silay nadawat nga impormasyon bahin sa pagpamaligya og illegal drugs sa usa ka grupo diha sa maong dapit hinungdan sa gilusad nga pagpaniid ug operasyon sa miaging gabii sa A. Lopez, Brgy. Calamba, Cebu City.

Gamit ang P500 nakapalit ang operatiba og shabu kang Gerald Botero, alyas Shawlen Botero, 20, residente sa maong lugar hinungdan sa pagkasikop kaniya ug apil sa gisikop ang iyang amahan nga si Orencio alyas Oryong, 55.

Laing lima ang nadakpan sa operatiba sud sa drug den nga silang William Paul Frizas Cuevas, 34; Ronelo Paborada Largado, 27; Christian Sienes Conejo, 25; Leonard Frizas Cuevas, 23; ug Rave Escolar Bello, 22. Nakakuha ang PDEA ug 18 ka paketeng gidudahang shabu nga nagkantidad og P402mil ;  cash nga P1,060; P500 buy-bust money; duha ka cellphones ug drug paraphernalia gikan sa duha.

Sa laing operation, nadakpan usab si Imelda Arroyo, 48, silingan sa duha tungod sa pagpamaligya og marijuana ug nakuha gikan kaniya ang walo ka putos sa marijuana, cell phone; ug P500 buy-bust money.

Si Arroyo mihimakak nga iyaha ang marijuana kay matud niya sa iya kadtong anak nga lalaki.

Sa laing bahin, ang City Intelligence Branch (CIB) nakadakop og 12 ka tawo kagahapon sa kaadlawon diha sa Brgy. Duljo-Fatima, Cebu City sa gihimo nilang anti-illegal drugs ug anti-criminality operations.

Ang naaresto mao silang Rafael Rivera, 36; Jennikalinz Wannemacher, 22; Hector Rivera, 53; Iris Alegado, 18; Julius Cabellon, 35; Jason Ortiz, 21; Junalyn Laporre, 25; Aldrin Dayondon, 42; Wilfredo Dayonot, 48; Dennis Delariarte, 45; Marvin Alicabo, 32; Aldie Debalso, 26; ug Jeffrey Bacasol.

Gilusad ang operasyon diha sa Sitio Buli, Plastican, Duco, ug Micabaja, sa maong barangay tungod sa report nga daghang namaligya og ilegal nga drugas ug daghan ang nalambigit sa illegal nga sugal.

Target sa mga polis si Rivera kinsa nadakpan sa buy-bust operation samtang ang uban nadakpan tungod sa paghupot og ilegal nga drugas. Samtang si Dayondon, Dayonot, Delariarte, Alicabo ug Debalso nadakpan kay nagsugal. Si Bacasol adunay warrant of arrest tungod sa illegal gambling nga giisyu sa Municipal Trial Court in Cities Branch 4, Cebu City.

Sa Talisay City, nadakpan ang usa ka Junifer Yosores Jr. alyas Junjie, 38, human sa buy-bust operation diha sa Mansueto Drive, Brgy. Bulacao niadtong Biyernes sa hapon.

Si PO2 Stephen Sefuesca sa Talisay City Police Station niingon nga adunay nitawag sa ilang buhatan ug nisumbong nga ang iyang silingan nga nangabang og kapuy-an sa lugar namaligya og shabu.

Pinaagi sa maong impormasyon gihimo dayon ang buy-bust operation nga niresulta pagkasikop sa suspek ug nakuhaan kini og 38 ka medium size packs nga adunay sud nga shabu.  (BANAT NEWS)