Naghikog kay wa ka-move on
CEBU, Philippines - Depresyon gumikan sa gugma ang nakitang hinungdan sa kapolisan dihang patay nang nakit-an sa usa ka amahan ang iyang 16 anyos nga anak babaye human kini naghikog sulod sa iyang lawak sa Brgy. Polo sa lungsod sa Alcantara pasado alas 9 sa nakalabay nga gabii.
Ang naghikog patay giila nga si Diane Marie Macasaol, estudyante sa grade 11 sa St. Augustine Academy sa maong lungsod. Matud sa hepe sa Alcantara Police Station nga si PSInsp. Andres Alpas kinsa nahinabi sa Banat News nga ang amahan sa namatay nga si Celso maoy nakadiskubre sa patay nga lawas sa iyang anak nga nagbitay sulod sa iyang lawak gamit ang pisi.
Sulay pa unta nila kining gidala sa Badian District Hospital apan nakabsan gayod kini sa iyang ginhawa.
Sa pagsubay sa kapolisan sa tunghaan sa batan-on, ang adviser niini nitug-an nga sa mga nanglabay nga mga adlaw ilang nabantayan nga magul-anon ang maong batan-on, sukwahi sa iyang naandan nga batasan nga malipayon.
Usa sa mga klasmit niini nga nahinabi sa mga polis nitug-an nga sa buhi pa ang batan-on, niistorya kini kaniya nga gusto na kining mobalhin og laing tunghaan kay dili siya ganahan nga makakita sa iyang kanhi hinigugma nga nagtungha sab sa ilang tunghaan.
Si Alpas miingon wala gayod silay laing nakita nga motibo sa paghikog sa batan-on kun dili mao nga lagmit wala na nakaagwanta sa depresyon ang batan-on hangtod nga misangpot sa pagkutlo niini sa iyang kinabuhi. (BANAT NEWS)
- Latest