Multicab nibangga sa taxi ug kural

CEBU, Philippines - Gumikan sa pagkisi-kisi sa usa ka babayeng menor de edad kinsa nahadlok og asa dad-on sa lalaking ilang gika-inom, nabangga hinoon ang gisakyan nilang multicab ngadto sa taxi ug koral sa may eskina Mambaling access road sa South Road Properties dakbayan sa Sugbo human naratol ang drayber niini.

Giasoy sa 14 anyos nga si Andrea, dili niya tinuod nga ngalan nga naila-ila nila sa iyang barkada ang drayber sa multicab sa may Bato, Ermita hinungdan nga gipasakay sila niini aron ihatod sa ilang balay. Apan inay mopauli, nasabutan sa iyang barkada nga mag-joyride ug nangita sila’g marijuana aron gamiton.

Dugang pa ni Andrea nga wa man silay nakit-an, nasabutan na lang nila nga mopalit og ilimnong makahubog.

Gitug-an niini nga dihang niaksyon siya’g kalipong ug mamauli na unta, gibiyaan siya sa iyang mga higala nga nanakay og motorsiklo, samtang siya gipasakay sa multicab nga adunay duha ka lalaking sakay sa luyo, hinungdan sa iyang kabalaka.

Tungod sa iyang pagkisikisi nagpakusog og dagan ang drayber ug gisikitan kini sa usa ka van nga nakabantay sa komusyon hinungdan nga naatrasan ang Ken Taxi nga gimaneho ni Danny Boybanting. Apan nisibat kini hangtud nga nibangga sa kural sa usa ka kompaniya sa tubig sa may Mambaling access road. Base sa pamahayag sa mga residente sa lugar, nilayat ang minor de edad gikan sa multicab samtang daling nakasibat ang driver sa multicab ug mga kauban niini.

Nakuha sa mga sakup sa Cebu City Transportation Office gikan sa multicab ang student permit ug OR/CR ni Wendell Caballa Dominguez, taga Bato Carbon ug sa pagsuwat ining balita, gisusi pa kun si Dominguez ba ang nagmaneho sa maong multicab. (BANAT NEWS)