Bag-ong commercial center sa Mingla, gibuksan

CEBU, Philippines - Gibuksan na ang bag-ong commercial center sa lungsod sa Minglanilla kagahapon nga nahimutang tapad sa bag-ong merkado publiko sa maong lungsod.Silang Mayor Elanito Peña, PB Member Miguel Magpale ug ang presidente sa Primary Properties Corporation nga si William Christopher Lui Jr. maoy nangulo sa ribbon cutting ceremony sa pagbukas sa Spark Commercial Center.

Ang maong modernong commercial center adunay 180 ka mga stalls  nga mahimong abangan gikan sa ground floor ug second floor alang sa mga nagkadaiyang serbisyo. Mahimo usab ang mga sari-sari store ug uban pa nga mahimong itinda.  Samtang 26 usab ka kiosks ang anaa sa roof deck.

Matud ni Lui nga ang maong edipisyo naghatag og kahigayunan sa mga micro enterpreneurs nga maka-display sa ilang mga produkto, hilabina kadtong dili makapwesto sulod sa mall.

Dugang niini nga haom ang lungsod sa Minglanilla nga butangan og commercial center kay mao kini ang stop over sa mga mobiyahe paingon o gikan sa habagatang bahin. Gidasunan usab kini ni Mayor Peña. Ang maong commercial center ubos sa Public-Private Partnership sa LGU Minglanilla ug sa Primary Properties Corporation ang developer sa maong proyekto.

Sobra sa usa ka tuig nga gitukod ang maong edipisyo nga gidesinyo sa inilang furniture designer ug manufacturer sa Sugbo nga si Kenneth Cobonpue.

Mitambong usab sa maong kalihukan si Presidential Assistant for the Visayas Michael Dino ug kini nagkanayon nga ang maong commercial center makahatag og kahigayonan sa mga gagmay nga negosyante nga mipakita ang ilang mga produkto.  (BANAT NEWS)