Di milagro ang tubod

CEBU, Philippines - May timailhan na nga dili usa ka milagro ang pagtubod sa tubig kilid sa San Roque Chapel sa Sitio Laguna, Barangay Basak-Pardo ning Dakbayan sa Sugbo.

Ang kadagkoan sa Metro Cebu Water District (MCWD) mipadala og ilang kawani aron pagsusi sa matang sa tubig nga mitubod kilid sa kapilya. Si Charmaine Rodriguez-Kara, corporate communications manager sa MCWD, nagkanayon nga ang pasiunang pakisusi nagpakita nga adunay chlorine ang tubig gikan sa maong tubod.

Nagpasabot kini nga dako ang posibilidad nga ang maong tubig gikan sa nabuslot nga tubo gikan sa MCWD, apan himoan pa gyud kini og dugang pakisusi human sa pista sa maong kapilya karong adlawa.

Matud ni Rodriguez-Kara nga ang ilang mga sakop nagdala na unta og leak detection gadget didto sa maong dapit nga motultol sa mga kawani sa MCWD kun asa dapit ang nabuslot nga tubo sa tubig. Ang tigpamaba sa MCWD miingon nga maglisod pa sila pagkakaron kay saba pa kaayo sa maong dapit tungod sa mga kalihukan sa pista maoy hinungdan nga mahimong ang pagpangita sa buslot nga tubo himoon karon nang semanaha.

Sukad sa kalit nga pagtumaw sa maong tubod sayo ning semanaha, daghang tawo ang nag-ambahan paingon sa maong kapilya aron sa pagkuha og tubig nga ilang ibanyos sa parte sa ilang kalawasan nga nakabatyag og dili maayong pamati.

Ang uban gani nga mga tawo, ilabi na kadtong adunay mga balatian, wala na makapaabot og higayon ug miinom sila direkta sa maong tubig sa paglaom nga mamaayo sila sa ilang balatian. Base sa makita nga ang kusog nga pagtubod sa tubig nagagikan sa sulod nga bahin sa kapilya.

Bisan si Jonie Reyes nga presidente sa kapilya miingon nga mikupos ang iyang hubag sa kamot human niya kini gituslo sa nagtubod nga tubig.

Si traffic enforcer Tayox Limbaga nga lumolupyo sa maong dapit mitug-an nga bisan giingnan nila ang mga tawo nga hayan dili kini milagro ang pagtubod sa tubig, apan nagpadayon ang katawhan sa pag-ambahan aron pagkuha og tubig gikan sa tubod kilid gyud sa kapilya.

 Apil sa mga miuban sa taas nga lumbay sa mga tawo nga naninguha nga makakuha og tubig mga langyaw ug adunay pipila kanila nga gikan pa sa lagyong mga lugar.

Apan ang tigpamaba sa Archdiocese of Cebu nga si Msgr. Joseph Tan mipahimangno sa publiko nga magmabinantayon ug dili dayon magtuo-tuo tungod kay basin og hatagan usab kini og laing kahulogan.

Matud ni Tan nga dili sila gusto nga "ma-offend" ang mga Kristiyano nga dili Katoliko ug moingon unya nga nagpatuotuo na usab ang mga Katoliko.

Kasagaran sa nakainom ug nakapanghaplas sa tubig nagkanayon nga na-arang-arang ang ilang gipamati nga sakit sa lawas.

Gipasabot ni Tan nga kung adunay giingong milagro nagkinahanglan kini og taas nga panahon alang sa lawom nga imbestigasyon.

Giawhag ni Tan ang Kura Paroko sa simbahan diha sa lugar nga mohatag og giya sa mga parokyano kabahin sa giingong milagro.

Apan kung ugaling talagsaon gyud ang nahitabo, ang simbahan magpahigayon niini og opisyal nga imbestigasyon.

Matud ni Tan nga walay dautan kung mangita og mga timailhan nga naa ang Ginoo naglihok sa kalibutan apan nagkinahanglan usab og lig-on nga pagtuo ang katawhan.

Matud usab ni Tan nga kada adlaw dunay mahitabong milagro pinaagi sa mga pag-ampo. Misugyot hinuon siya nga mas labing maayong ipasusi ang tubig sa DOH kun limpyo ug luwas ba kining gamiton sa tawo.  (BANAT NEWS)