Dengue vaccination sa Oktubre na

CEBU, Philippines - Mahinayon na karong Oktubre ang pagpamakuna batok sa dengue sa Central Visayas nga mas sayo kaysa unang gikatakda sa sayong bahin sunod tuig.

`Ang anti-dengue vaccine alang sa mga tinun-an sa Grade 4 nga maoy target sa Department of Health sa tanang pangpublikong tunghaan.

Matud ni Renan Cimafranca, ang hepe sa Regional Epidemiology and Surveillance Unit-7, nga karong Oktubre ang unang hugna sa vaccination nga molanat sa unom ka buwan.

Target sa DOH nga mahurot sa pagpamakuna ang mga bata nga nagpangedaron og 9-anyos nga nagtungha sa mga pangpublikong tunghaan.

Apan gitug-an sa kadagkuan sa DOH nga bisan og aduna na ang anti-dengue vaccine, dili gihapon angayan mokompiyansa ug ipadayon gihapon ang pagpanglimpyo sa panimalay ug palibot aron malikayan ang maong sakit.

Dili man sinto porsiyento nga garantiya nga dili na masakit og dengue ang mga bata apan base sa pagtuon, ang bakuna makapaubos kini sa kaso ug komplikasyon batok sa maong sakit.

Sayo niini si DOH Undersecretary, Dr. Gerardo Bayugo, nitug-an nga kung sa pribado nga doktor, ang pagpa-immunize sa bata mogasto og labing barato P3,000 samtang P10,000 ang labing taas apan sa DOH libre kining ihatag ngadto sa mga bata sulod sa tulo ka higayon.

Gitug-an usab ni Bayugo nga adunay ginagmay nga epekto ang immunization sama sa rashes, hilanat, labad sa ulo ug uban pa. (BANAT NEWS)