Labella nangayo’g legal opinion

CEBU, Philippines - Nidangop sa Department of Interior and Local Government (DILG-7) si Cebu City Acting Mayor Edgardo Labella nunot sa pagtudlo ni Cebu City Mayor Tomas Osmeña kang Acting City Administrator Veronica Morelos isip laing acting mayor.

Giklaro ni Labella nga tumong sa iyang pagdangop sa DILG mao nga makapagawas sila og legal opinion aron dili na masubli og usab ang hitabo.

Gihulagway niini nga ang pagtudlo og laing acting mayor maghatag og kalibog sa mga tawo kun kinsa ang ilang duolon.

 Gipadayag ni Labella nga klaro kaayo sa balaod sa Section 46 sa Local Government Code nga ang bise mayor maoy molingkod isip acting mayor kun molarga sa gawas sa nasud ang mayor. Mahimo ra ang mayor nga motudlo og tawo isip iyang representante kun kini molarga sulod lang sa Pilipinas apan dili molapas sa tulo ka adlaw kay mahimong automatic usab nga ang bise mayor maoy molingkod isip acting mayor.

Karong adlawa gikatakda nga mobalik sa Sugbo si Osmeña apan gipaabot nga sa mga mosunod nga mga adlaw molarga na usab kini.

 Nakadawat usab og suwat-hangyo si Labella gikan kang San Roque Barangay Captain Cyrus Lindog nga hatagan sila’g sakyanan sa ilang barangay kay gikinahanglan kini kun adunay emerhensiya.

Si Lindog mitug-an nga aduna silay nakit-an nga government vehicle nga giparada sa sulod sa propeyedad sa usa niya ka barangay kagawad nga sakup sa BOPK. Giingong gigamit ang maong sakyanan sa personal nga panginahanglan.

Apan dili makahatag si Labella gumikan sa memo nga giisyu ni Mayor Osmeña. Kini usab ang nahimong katarungan ni General Services Head Ronald Malacora.

Kahinumduman nga sa wala pa milarga si Osmeña, nanugon kini kang Malacora nga dili ipanghatag ang tanang city-owned vehicles sa bisan kinsang opisyal. Kun pakyason kini, hayan mopasaka siya og kaso.

Nasayran nga lakip nga gipangbawi ni Osmeña aron maimbentaryo ang mga ambulansiya.

Gumikan sa maong isyu ang Association of Barangay Councils gikatakdang mopagawas og resolusyon aron mohangyo sa Ombudsman nga dili sila mouli sa mga sakyanan kay gamit kini sa pagserbisyo sa ilang mga konstituwente. Decemay P. Padilla ug Rose Ann Mañanita (BANAT NEWS)