Upat nangapusilan patay
CEBU, Philippines - Upat na usab ka mga kinabuhi ang nakalas sa managlahing police operations ug ang duha kaso sa pagpamusil nga binuhatan sa wala mailhing mga tawo dinhi sa Sugbo.
Sa miaging adlaw sa Lunes sa alas 2:30 sa hapon, nakabsan sa kinabuhi si John Paul Misterio, 18, sa Sitio Salvacion, Brgy. Maguikay human misukol sa buy-bust, matud ni Police Senior Inspector Janelito Marquez, hepe sa Mandaue City Police Station 4- Casuntingan.
Nagkanayon si Marquez nga si Misterio usa ka drug surrenderer apan nibalik sa maong ginadiling kalihukan.
Matud ni Marquez, nakabantay si Misterio nga polis ang nakigtransaksyon kaniya ug nition niini og .38 caliber revolver apan naunhan siya sa mga backup diha sa dughan.
Nakuha kaniya ang 14 ka paketeng shabu, drug paraphernalia ug P300 buy-bust money.
Patay usab si Gilbert Maturan, 23, human misukol sa polis dihang kini dakpon diha sa Sitio Ihawan, Brgy. Mantuyong. Nakuha sa posisyon ni Maturan, ang usa ka .38 revolver, police buy-bust money ug usa ka gamay’ng putos sa shabu.
Sa laing bahin, si Armando Tuico, 43 anyos ang gipusil sa wala mailhing tawo kagahapon sa buntag diha sa Barangay Ibabao-Estancia sa mao gihapong siyudad. Naigo sa wa nga bahin sa nawong si Tuico nga miresulta sa iyahang kamatayon.
Samtang patay si Alex Reyes, usa ka PUJ dispatcher sa Brgy. Punta Prinsesa, Cebu City nga giingong tiggamitan og ginadiling drugas human kini kalit gipusil sa wala mailhing tawo. Christell Fatima Tudtud, Romeo Limpangog ug Jojo Ugdol (BANAT NEWS)
- Latest
