Bag-ong munisipyo tukuron sa Minglanilla

CEBU, Philippines - Gikatakdang magtukod og bag-o ug daku nga munisipyo ang kagamhanan sa Lungsod sa Minglanilla.

Kini human ilang nakita nga nagpadayon og ka daku ang ilang populasyon ug nagkadaghan na sab ang mga tawo nga adunay katuyoan sa mga opisina sa ilang munisipyo.

Si Municipal Administrator Concordio Mejias nibutyag nga pinaagi sa hunahuna ni Mayor Elanito Peña ilang iapil sa annual budget sunod tuig ang P30 milyones aron sa pagpalit sa tres ngadto sa singko ektaryang luna nga tukuran sa munisipyo.

Posibleng magkuwang ang kantidad nga ilang ipasulod sa annual budget apan wala sila nabalaka niini tungod kay aduna pa silay mga proposal nga himuon aron kini mapun-an.

Matud ni Mejias nga nangita pa sila og luna sa pagkakaron nga sigo sa gidak-on nga ilang giplanuhan apan mas ganahan nila mao ang lugar nga naa sa Barangay Ward I nga dili layo sa merkado.

Asoy ni Mejias nga kun ang yuta makit-an na hayan isunod nila ang pagpatukod na gyud sa bag-ong munisipyo ug magpatabang sila kang Kongresista Gerald Anthony “Samsam” Gullas.

Dugang pa niya nga ang pagtukod sa bag-ong munisipyo pangandam kini nga mahimong siyudad ang ilang lungsod.

Kwalipikado na sa populasyon ang lungsod ug duol na sab nila makab-ot ang income qualification samtang gipaabot nila ang daku nga reclamation project sa ilang lungsod aron makadugang sa gidak-on sa land area ug hingpit na gyud sila makapasar ug mahimo na nga siyudad ang lungsod.  (BANAT NEWS)