Dunay foul play?

CEBU, Philippines - Midangop sa homicide section sa Cebu City Police Office ang mga higala ug pamilya sa babaye nga nalumos patay sa Kabang Falls sa Brgy. Budlaan niadtong Sabado aron mangayo og tabang sa pagtuo nga adunay foul play ang hitabo.

Giila ang biktima nga si Joy Sayre, 16 anyos taga Brgy. Subangdaku sa Dakbayan sa  Mandaue.

Usa sa mga midangop ang silingan ug suod nga higala sa namatay nga si Katrina Marcial. Gusto niya nga mahatagan og hustisya ang kamatayon sa iyang higala.

Matud niini nga kun basihan ang naangkon nga samad og bun-og sa ulo sa biktima daw sa aduna gyuy foul play kay nganong ang maong parte sa lawas ra maoy nagrabehan ug wala ang ubang bahin niini.

Misamot ang ilang paningkamot nga mangita og hustisya human gitug-an ni Marcial nga ilang nabantayan nga sama og naghilak ang biktima bisan og gihaya na gumikan sa mga luha gikan sa iyang mga mata.

Matud sa usa sa mga imbestigador sa homicide section nga si PO3 Winston Ybañez nga kun basihan ang autopsy report, walay foul play silang nakita ug wala usab pahimusli ang biktima.

Gipasabot ni Ybañez nga posibling nabunal ang ulo sa biktima dihang natugpa kini sa tubig, apan iyang gipaniguro nga ilang himoon ang tanan aron masubay kun gituyo ba sa pagpatay ang 16 anyos.

Usa sa ilang plano mao ang pagbisita sa lugar kun asa nakita ang patay’ng lawas sa biktima.  (BANAT NEWS)