Bag-ong natawo gibilin sud sa karton
CEBU, Philippines - Nakit-an sa mga residente sa Sitio New Sangi Road, Pajo, Dakbayan sa Lapu-Lapu ang babaye nga puya nga gisulod og karton kagahapon sa buntag.
Ang karton gitungtong lang kini sa lamesa nga nahimutang gawas sa usa ka tindahan pasado alas 5 sa buntag, matud ni Mussah Ustal, 37-anyos, residente sa maong dapit.
Nagkanayon si Ustal nga wala kini niya unang gitagad hangtud ang laing silingang lalaki ang nakamatikod nga dunay bata nga naghilak.
Dali nilang giabli ang karton ug nakit-an ang bata nga gikan pa lang gipanganak.
“Ang sulod sa karton, naay bag nga itom. Naa pud jacket sa dakung tawo (adult sized-jacket),” matud ni Ustal.
Unang nitawag og polis si Ustal apan giabisohan siya nga motawag sa Department of Social Welfare and Development.
Tungod kay inahan sab si Ustal nga dunay duha ka anak, nitawag kini sa Emergency Rescue Unit Foundation ug nikuyog kini siya sa ambulansya padulong sa tambalanan samtang nagkarga sa karton tungod ang bata samtang naghilak, duna pay inunlan.
Gidala ang bata sa Lapu-Lapu City Hospital diin padayong giatiman sa mga doctor.
Si Police Officer 3 Joseph Rouel Cutanda sa Lapu-Lapu City Police Office-Homicide Section kinsa nakaresponde sa insidente nagkanayon nga plano nilang i-turn over sa DSWD ang bata. (BANAT NEWS)
- Latest
