Isumbong gamit ang social media

CEBU, Philippines - Dunay panawagan si Mandaue City Mayor Luigi Quisumbing ngadto sa publiko, kini ang paggamit sa social media ilabi na sa Facebook kun adunay makit-an nga violations. Nasayran nga ang siyudad bag-o lang mipatuman sa istriktong balaod sama sa trapiko ug sa dili na paggamit og plastic.

"We encourage people to post or report any violations. We really do need the help of the public," tataw ni Quisumbing.

Dugang sa mayor nga kun aduna silay madawat nga report online, ila dayon kining ipatubag sa ahensya o buhatan nga responsable sa isyu aron daling mahatagan og solusyon.

Sagad nga madawat nga reklamo o taho ni Quisumbing, adunay kalabutan sa problema sa trapiko, peace and order ug solid waste management. Gani nangayo siya og pasaylo sa mga wala matubag sa Facebook gumikan sa kadaghan nga mipadangat sa ilang mga reklamo.

Kahinumduman nga sa mga milabay’ng semana, ang Traffic Enforcement Agency of Mandaue kon TEAM daling mipahigayon og operasyon sa nadawat nga report bahin sa trip cutting sa mga PUJ nga padulong sa lungsod sa Lilo-an ug Consolacion nga miresulta sa pagkumpiska sa mga karatula ug paghatag og citation ticket sa mga drayber.

Gumikan sa mga taho nga nadawat sa TEAM gikan sa mga concerned citizens, ilang gihimo ang "Bantay Mandaue-Team" sa Facebook nga maoy opisyal nga modawat sa mga reklamo gikan sa mga netizens.

"We need your help to be our eyes in the city!  #NoBlindSpotsintheDisciplineZone," matud pa ni Quisumbing sa iyang Facebook account. (BANAT NEWS)