VM, 2 konsehal makasesyon

CEBU, Philippines - Makapahigayon og sesyon ang nahabiling upat ka konsehal sa Dakbayan sa Sugbo sumala pa sa Department of Interior and Local Government.

Kini ang tubag sa DILG sa suwat ni acting Vice Mayor Lea Japson niadtong Mayo 19 aron klaruhon kung pwede ba nga makapahigayon sila og sesyon bisan og upat na lang sila sa konseho.

Si DILG-7 Director Rene Burdeos nagkanayon sa iyang suwat nga ubos sa DILG Opinion No. 034, series of 2012, makonsiderar nga quorum ang nahabilin nga mga konsehal human masuspenso ang 12 ka konsehal kuyog ni Mayor Michael Rama ug Bise Mayor Edgardo Labella. 

Ang nahabilin mao na lang sila si Konsehal Margarita Osmeña isip acting mayor, Japson isip acting vice mayor, James Cuenco ug Richard Osmeña. Si Japson nagkanayon nga magpahigayon na sila og sesyon karong Miyerkules, Hunyo 1. Matud ni Japson nga wala pa siya kahibawo sa ilang hisgutanan sanglit wala pa niya makita kung unsa ang naa sa agenda. (BANAT NEWS)