Maestro, laing 13 sikop

CEBU, Philippines - Nasikop ang 14 ka mga tawo lakip na ang giingong magtutudlo nga nadestino sa Lungsod sa Barili sa gihimong buy-bust operation sa City Anti-Illegal Drugs Special Operations Task Group (CAIDSOT) sa Cebu City Police Office niadtong Miyerkules sa gabii. Ang buy-bust operation gipuntariya sa usa ka Archie Roma, 33, diha sa Brgy. Sambag 1, Dakbayan sa Sugbo ug giila nga Level 2 drug pusher.

Gawas kang Roma, nasikop usab ang kauban niini nga si Bayani Alcomendras, ug ang giingong usa ka magtutudlo sa Barili nga si Jeramil Sacil, 34,  ug laing 11 ka tawo. Matud pa sa kapolisan naaktuhan sila nga nanuyop.

Si Senior Inspector Eunil Avergonzado, pangulo sa CAIDSOT, niingon nga ang area nga ilang gironda gihimo nga drug den ug duna pay karera ug mole-mole gambling machines.

Nasayran nga gikan sa lagyo nga dapit ang mga parokyano ni Roma nga motuyo lang gyud og anha aron manuyop.

Sumala pa nga dili mominus sa 300 gramos nga shabu ang mabaligya ni Roma matag semana. Sumala pa nga gikan sa Muntinlupa ang suplay niini. Nakuha sa maong operasyon ang 12 gramos nga shabu nga nagkantidad og P150 mil, upat ka bala ug  usa ka .38 paltik snubnose revolver.

Dihang gikuhaan sa iyang habig si Roma kini mihimakak nga iyang gihimong suyopanan ang iyang panimalay ug wala siya masayod kun diin gikan ang mga ebidensiya nga nakuha sa kapulisan ug di tinuod nga namaligya siya niini.

Matud niya nga ang mga tawo nga gisikop sagad kanila mga boarders ug kadtong magtutudlo nga apil sa gidakop nangita lang og kaabangan ug naatol lang anaa kini didto hinungdan nga gisikop.

Gisuwayan sa pagkuha sa iyang habig ang magtutudlo apan nagdumili kini sa pagtubag sa mga pangutana.

Samtang, gibutyag ni Dr. Rhea Mar Angtud, Cebu Schools Division Superintendent sa Department of Education (DepEd) Cebu Province kagahapon lang siya nakahibalo sa maong balita.

Gimandoan niya ang district supervisor sa lungsod sa Barili sa pagsusi sa report ilabi na nga wala pa masayri kun asa nga tunghaan sa lungsod nagtudlo ang maong magtutudlo. Buot usab niyang paimbestigaran ang maong insidente.

Kun mapamatud-an nga sad-an ang maong magtutudlo mag-atubang kini og silot diin mahimo kining mawagtangan og trabaho ug mahimo usab kining makuhaan og lisensiya sa Professional Regulation Commission (PRC). (BANAT NEWS)