Nangandam sa baha
CEBU, Philippines - Nangandam na ang mga lokal nga kagamhanan sa epekto sa mga pag-uwan nga nagsugod na sa pagkakaron.
Ang kagamhanan sa Dakbayan sa Mandaue padayon ang pagpang-ayo sa drainage system, matud ni Felix Suico, ang pangulo sa disaster team.
Apan namatikdan nga ang drainage projects sa Department of Public Works and Highways wala magsilbi tungod kay sa unang pagbunok sa uwan sa niaging gabii nakasinati man og mga pagbaha ang pipila ka dapit. Nakasinati og mga pagbaha ang Barangay Subangdaku dihang niawas ang Mahiga Creek, napuno usab sa tubig ang Guizo Elementary School, dalan Plaridel eskina A.C. Cortes Avenue, Consuelo Village sa Barangay Basak ug uban pa.
Hinuon matud ni Suico nga wala silay nadawat nga dagkung panghitabo gawas lang sa ilang pagpabakwit sa kapin 60 ka pamilya sa Purok 2 ug 6 sa Barangay Cubacub kagahapon human ang kanal niawas.
Hangyo ni Suico ilabi na niadtong mga nagpuyo sa delikado nga mga lugar nga kung dunay kusog kaayo nga uwan, dili huwaton nga mosaka ang tubig. Matag barangay sa Mandaue adunay mga evacuation centers sama sa mga tunghaan ug mga multi-purpose buildings.
Giila nga sagad bahaan sa dakbayan ang Barangay Banilad, Guizo, Maguikay, Cambaro, Looc, Umapad, Paknaan, Cubacub ug Basak.
Samtang si Lapu-Lapu City Mayor Radaza sa iyang bahin niasoy nga subsob ang monitoring sa ilang disaster officer nga si Andy Barame ug gisusi usab nila kun unsa nga mga lugar ang nagkinahanglan og atensiyon. Ang Police Regional Office-7 nangandam usab sa seguridad atol sa ting-uwan.
Matud ni PRO-7 Director Patrocinio Comendador nga human sa eleksiyon pa siya nihatag og kamanduan sa mga city ug provincial directors sa kapolisan.
Apil sa ilang bantayan ang mga evacuation centers samtang may kahimanan usab sila sa rescue operations.
“Rule namo is to secure the area apan kami usab ang first responder,” matud ni Comendador.
Walay nadawat nga report ang Provincial Disaster Risk Reduction and Management Office gikan sa kalungsuran sa danyos sa niaging mga pag-uwan.
Matud ni Julius Regner, tigpamaba sa PDRRMO, nga walay angay ikabalaka sa pag-uwan sama kagahapon sa buntag sanglit gikan pa kini sa kainit ug igo ra maka-recover ang nauga nga yuta dala sa El Niño.
Apan matud ni Regner nga dili angay mokompiyansa tungod kay kung masundan ang pag-uwan kagahapon posible na kining magdala og kadaut. Ang PDRRMO nipahimangno sa mga local government units nga magbantay ilabina sa mga lugar nga delikado sa pagbaha ug pagdahili sa yuta.
Ang mga lungsod nga delikado sa pagbaha mao ang Dumanjug, Ronda, Alcantara, Argao, Dalaguete, Sibonga ug Dakbayan sa Carcar samtang ang Balamban, Alegria, Moalboal, Malabuyoc, Ginatilan ug Dakbayan sa Talisay ang prone sa landslide. Decemay P. Padilla, Romeo T. Limpangog, Sheriza Mae R. Uy ug Le Phyllis F. Antojado (BANAT NEWS)
- Latest