Electrician nakuryentehan patay
CEBU, Philippines - Patay na nga nadangat sa Pinamungajan District Hospital ang usa ka electrician sa Cebu Electric Cooperative (CEBECO) III human nakuryentehan sa niaging adlaw.
Si Renato Briones Rosarito, 44, taga Dumlog, Dakbayan sa Toledo, nakuryentihan samtang adunay giayo ibabaw sa poste sa Bulubugan, Tajao, Lungsod sa Pinamungajan.
Si Police Officer 1 Vigil Toledo, desk officer sa Pinamungajan Police Station nitug-an nga nadawat nila ang alarma alas 5:30 sa hapon niadtong Domingo.
Ilang naabtan ang biktima nga nagbitay sa poste sa CEBECO nga wala nay panimuot ug pasado na alas 6 sa gabii nakuha.
Nasayran nga nag-uwan atol sa pagkatkat ni Rosarito sa maong poste ug posibleng grounded kini hinungdan nga nakuryentihan ang biktima.
Si Rosarito usa ka barangay electrician nga gi-hire sa usa ka kompaniya sa pag-ayo sa wiring tungod sa pag-upgrade sa ilang mainline.
Matud sa hepe sa Pinamungajan Police Station, Inspector Gilfred Baroman, nga isip barangay electrician ang biktima mangayo lang og mga wire sa kabalayan.
“Bawal ang iyang gibuhat, kay trabaho man na unta sa mga taga CEBECO,” matud ni Baraman. (BANAT NEWS)
- Latest
