Rama gikiha og electioneering
CEBU, Philippines - Nisang-at og kaso batok kang Mayor Michael Rama ang magpapili sa pagkakonsehal nga si Danilo Pacaña human sa giingong pagpanghatag sa mayor og tag P15,000 sa mga barangay kapitan sa dakbayan.
Matud ni Pacaña sa iyang complaint-affidavit nga base sa iyang nabasahan sa mga pamantalaan niadtong Abril 6, nihatag usab si Rama ngadto sa mga barangay konsehal og tag P9,000 ug tag P6,000 sa mga secretaries ug treasurers.
Si Pacaña kinsa sakop sa Bando Osmeña Pundok Kauswagan nagkanayon nga kini paglapas sa Omnibus Election Code labot sa vote-buying ug vote-selling.
Nibutyag si Pacaña nga matud ni Konsehal Margarita Osmeña nga chairman sa committee on budget and finance nga ang P31.6 milyones gikuha gikan sa aid to city barangays ubos sa allowance sa annual budget sa 2015.
Gikwestiyon usab ni Pacaña kung nganong sa Waterfront Cebu City Hotel gipahigayon ang pagpanghatag sa mga incentives.
Si Rama sa iyang bahin niingon nga wala siyay nakita nga paglapas sa balaud sa eleksiyon.
Matud niya nga iyang tubagon ang pasangil ni Pacaña human sa piniliay sanglit matud niya nga ang pagpangandam sa piniliay karong Lunes ang iyang giatiman. (BANAT NEWS)
- Latest
