Muslim leaders, Alimaong suporta sa Team Rama
CEBU, Philippines - Pormal nga gi-indorso sa mga Muslim leaders sa Dakbayan sa Sugbo ug Lumad-Alimaong ang Team Rama kagahapon sa Hotel Fortuna. Matud ni Hadji Rasul P. Abangon nga adunay 9,320 ka rehistradong botanteng Muslim sa dakbayan ug segurado nga ang kapin sa 8,500 mobotar sa Team Rama.
Matud ni Abangon nga ang kadali maduolan mao ang bugtong rason kung nganong si Mayor Michael Rama ug kaubanan ang ilang suportahan sa eleksiyon.
Nagkanayon si Abangon nga gipahimangnuan nila ang ilang kaubanan sa paghan-ay daan sa ilang botaran aron usab makatabang sa hapsay nga piniliay.
Si Ha Datu “Tatay” Hadar, secretary-general sa Supreme Council of Datus-Alimaong niingon nga wala silay pangayuon ngadto kang Rama kung molingkod pag-usab sa pwesto apan magpatabang sila kung adunay motumaw nga demolisyon sa ilang mga panimalay.
Samtang si Rama nagkanayon nga mapasigarbuhon ug mapasalamaton siya nga wala siya hikalimti sa Muslim communities sa dakbayan.
Sa laing bahin, wala igsapayan ni Rama ang wala pag-indorso sa Iglesia Ni Cristo kaniya sanglit dili na kini bag-o alang kaniya kay wala usab kini nisuporta kaniya sa niaging piniliay. (BANAT NEWS)
- Latest
