Hepe sa CT-TODA gireklamo sa tigbalita

CEBU, Philippines - Gireklamo sa usa ka magsisibya ang pangu sa City of Talisay-Traffic Operation Development Authority (CT-TODA) nga si Venerando Tecson gumikan sa matud pa pagpanghulga niini kaniya.

Si Aram Gines, reporter sa DYRF Radyo Fuerza nidangop sa kapulisan human sa nahitabong komosyon sa buhatan ni Tecson.

Nisaysay si Gines nga niadtong Martes sa buntag niadto siya sa Talisay City Hall aron sa pagpangita og balita.

 Samtang diha siya sa buhatan  ni Tecson nakahisgot kini bahin sa pagkasikop ni Dina Ceniza, kandidato pagkakonsehal ubos sa grupo ni mayor.

Sumala pa niya, pagkadungog ni Tecson gibaraw siya niini ug giingnan nga dili magpataka og estorya tungod kay dili tinuod nga gisikop si Ceniza ug mihulagway ni Gines nga bakakon nga pagka-reporter.

"Giingnan pa gyud ko niya nga kanyahay ra nga pamatyon ang mga reporter didto sa Mindanao kay mao ang magda sa gubot. Mga balita pulos botbot," asoy pa ni Gines.

Sa sunod adlaw, si Gines nagkanayon nga nipalit siya sa tanang mantalaan ug gibalik si Tecson sa iyang buhatan ug gipakita kang Tecson nga wala siya nagtumo-tumo sa iyang estorya kalabot ni Ceniza. Apan matud pa nasuko si Tecson ug gihagit kun unsa ang iyang gusto dungan sa pagtulisok ug miaksyon nga adunay ibton gikan sa iyang hawak.

Gawas kang Gines, aduna na say nahitabong mainitong tinubagay si Tecson sa usa ka reporter sa Bombo Radyo nga si Crisle Adlawan. 

Nag-abot na sab sila diha sa buhatan ni Konsehal Val Ylanan aron mahilot ang ilang kasungian.  Si Adlawan nagkanayon nga gusto unta siya nga mo-interview ni Tecson apan ang naulahi nanginsulto ug nisaka pa ang tingog nga daw dili siya magpa-interview. Si Adlawan nga wala mahimuot ni Tecson hinungdan nga nisumbong kini Ylanan kinsa maoy chairman sa CT-TODA.  Gisuwayan sa Banat News pagkuha og habig si Tecson apan napakyas ang maong tinguha. (BANAT NEWS)