City Hall namalit og dugang fire trucks

CEBU, Philippines - Ang kagamhanan sa dakbayan sa Sugbo mitugyan kagahapon og dugang lima ka fire trucks ngadto sa Cebu City Fire Station ug sa upat ka barangay aron magamit sa mga bombero kun adunay mahitabong sunog.

Tagsa ka fire truck ang gihatag ngadto sa Cebu City Fire Station, ug sa upat ka barangay ang Quiot, Basak-San Nicolas, Basak-Pardo, ug Suba.

Migasto ang dakbayan og P27.5 milyones sa pagpalit sa maong mga fire trucks. Ang labing dako nga fire truck nga nagkantidad og P13.5 milyones maoy gihatag sa Cebu City Fire Station samtang ang tag P3 milyones maoy gihatag sa barangay.

Si Konsehal Dave Tumulak, presiding officer sa Cebu City Disaster Risk-Reduction and Management Council, mitataw nga gi-order nila ang maong mga fire truck kaniadto pang miaging tuig, apan karon lang gi-deliver sa supplier.

Ang salapi nga gigamit pagpalit sa maong mga fire truck gikuha gikan sa Disaster Fund sa dakbayan. Ang balaod naglatid nga singko porsiyento sa matag budget, itagana isip disaster fund.

Matud ni Tumulak nga ang mga fire fighters sa kabarangayan nga gihatagan og fire truck gitudloan na kun unsaon sa paggamit ang maong kahimanan kun moresponde sila og sunog.

Gawas sa pagresponde sa sunog, matud ni Tumulak nga ang maong mga fire trucks nga stainless ang tangke magamit usab sa paghatud og mga tubig mainom sa mga dapit nga nagnihit og tubig.

Si Tumulak miingon nga gibalik ra nila ang buwis sa katawhan pinaagi sa pagpalit og mga ekipo para sa ilang kaluwasan. May dugang firefighting equipment pa nga muabot nga gi-request sa Bureau of fire Protection sa miaging tuig. 

Karong Biyernes ang dakbayan manghatag usab og mga ambulansya.

Samtang si Konsehal Eugenio Gabuya Jr. misugyot og ordinansa nga pahatagan og P10 mil nga monthly honorarium ang matag sakop sa barangay volunteer fire brigades. (BANAT NEWS)