5 mil kandila nakasunog sa kapilya

CEBU, Philippines - Naugdaw ang San Vicente Ferrer Chapel sa Barangay Pitalo, Lungsod sa San Fernando human sa nahitabong sunog kagahapon sa hapon.

Sigon ni Inspector Cecile Alicaya, Fire marshal sa maong lungsod giingong pasado alas 4 kagahapon dihang miulbo ang sunog nga nagsugod sa likod nga bahin sa kapilya.

Dugang ni Insp. Alicaya nadawat nila ang alarma mga alas 5 na sa hapon. Base sa ilang inisyal nga imbestigasyon giingong gidagkutang kandila nga wala maatiman ang hinungdan sa sunog nga milamoy sa kapilya ug sa laing 13 ka panimalay nga duol sa maong dapit.

 Si Alicaya, mibutyag nga midanyos og dili mominus P600 mil.

Tungod sa maong hitabo, bumper to bumper ang traffic nga nasinati sa maong barangay ilabi na sa dalan padung sa habagatan.

Gihulagway hinuon sa kabomberohan nga partially burned ra ang kapilya sanglit ang kisame lang niini ang nagusbat.

Ang sunog giisa ngadto na sa 3rd alarm mao bisan ang kabomberohan sa siyudad sa Sugbo lakip sa miresponde.

Si Cary Manlosa, presidente sa San Vicente Ferrer Catholic Association miingon nga ilahang ipatan-aw una sa usa ka safety engineer ang edipisyo una sila mopaayo sa kapilya.

Matud pa sa mga residente didto giingong may usa ka deboto nga nagdagkot og 5 mil ka kandila sa kapilya ug gituohang mao kini hinungdan sa pag-ulbo sa sunog. (BANAT NEWS)