Kahoy nakalangan pagpalapad sa Gorordo

CEBU, Philippines - Duha ka punoan sa dagkung kahoy maoy nakapalangan sa tinguha ni Mayor Michael Rama sa pagpalapad sa kabahin sa Gorordo Avenue dapit sa eskina Sudlon sa Barangay Lahug, Dakbayan sa Sugbo.

Si Eli Espina, kawani sa Public Information Office sa Cebu City Hall ug kabahin sa grupo nga Kahayag nga gitahasan sa mayor nga mapalapdan ang Gorordo Avenue dapit sa simbahan sa mga Mormons, niingon nga nangayo na sila og pagtugot nga maibot ang duha ka dagkung kahoy.

Matud ni Espina nga wala pa sila kadawat og pag-uyon gikan sa Department of Environment and Natural Resources (DENR) mao nga nalangay ang pagpalapad sa karsada.

Nabantayan usab nga si Rama wala na makaasikaso sa pag-awhag sa kadagkuan sa The Church of Jesus Christ of Latter-Day Saints nga mosugot nga isibog ang ilang sementado nga koral gikan sa daplin sa karsada.

Duha ka buwan ang nilabay, si Rama niadto gyud sa Manila ug nakigtagbo sa kadagkuan sa simbahan sa mga Mormons apan gibalibaran siya sa iyang hangyo.

Natan-aw ni Rama nga ang koral sa simbahan nilapas na sa gilapdon sa karsada. Ang mga tag-iya sa kabalayan dapit sa eskina Sudlon boluntaryo nga niguba sa ilang mga balay kay nasayud sila nga nakalapas sila sa yuta sa gobiyerno.

Gusto ni Rama nga unta ang kadagkuan sa simbahan motan-aw pag-ayo sa maong dapit aron ilang makita nga karong gipalapdan na ang unahan nga bahin sa ilang simbahan, ang ilang koral nga semento nilapas gyud sa sukod sa karsada.

Napanglantawan ni Rama nga kung kapalapdan na sa hingpit ang maong dapit, dili na kaayo maghuot ang mga sakyanan nga moagi. (BANAT NEWS)