Motorcade sa Kusgano, grand rally sa Deretso

CEBU, Philippines - Gipahigayon sa Team Kusgano ang usa ka motorcade nga gipangulohan sa kandidato sa pagka-mayor nga si Rolando Patalinjug sa kadalanan sa Dakbayan sa Lapu-Lapu kagahapon sa buntag.

Gisugdan ang kalihukan sa alas 7 sa buntag ug nahuman sa alas 12 sa udto.

“Didto nag-start sa Punta Engaño. Naay nag-atang sa Barangay Mactan ug Barangay Buaya. Tulo ka area ang gipundukan ug didto na nag-abot-abot,” matud ni Patalinjug.

Kuyog sa motorcade si Rufo Amores sa pagka-bise mayor ug Celedonio “Celsi” Sitoy sa pagka-kongresista ug tanang kandidato sa pagka-konsehal.

Unang gituyok sa grupo ang Barangay Pusok, Poblacion, Looc, Canjulao, Babag ug nibalik og tuyok sa Barangay Gun-ob, Marigondon, Agus, Maribago, Bankal, Mactan ug Pajac.

Matud ni Patalinjug nga ang ilang grand rally himuon karong Mayo 6.

Samtang ang Deretso Team nilang Mayor Paz Radaza ang nipahigayon og grand rally sa City Hall ground sa niaging Sabado sa gabii.

Kuyog niini ang kompletong line-up lakip sa anak ni Radaza nga si Kongresista Aileen Radaza.

Matud ni Mayor Radaza nga kung masublian siya sa pagka-mayor, padayunon niya ang pag-atiman sa mga kinahanglanon sa mga residente, kampanya batok sa ilegal nga drugas ug ang pagpalambo sa turismo aron makamugna og daghang trabaho. (BANAT NEWS)