10 mil ka election volunteers ipakatap sa eleksyon

CEBU, Philippines - Dul-an sa usa ka libo ka mga tawo nga representante sa mga parokya nga sakop sa Archdiocese of Cebu ang niapil sa gipahigayon nga final briefing sa Cebu Citizens Involvement and Maturation for People Empowerment and Liberation or C-CIMPEL kagahapon sa buntag sa SPFY covered court sa may Archbishop Palace ning Dakbayan sa Sugbo.

Nangulo sa maong kalihukan ang executive director sa C-CIMPEL Marilou Chiongbian uban sa presensiya nila ni Provincial Election Supervisor Atty. Eliseo Labaria ug mga sakop sa kapulisan diin gituki ang mga gimbuhaton sa mga volunteers sa umaabot nga eleksyon.

Gituki usab sa maong final briefing pag-escort sa mga dokumento diin nakapangutana ang mga volunteer sa C-CIMPEL ngadto sa election officer ug sa kapulisan may kalabutan sa mga kalihukan  sa elections.

Gitug-an ni Chiongbian nga preparado na sila tanan sa mga kalihukan sa elections diin aduna silay dili mominos walo ka libo ngadto  napulo ka libong volunteers gikan sa mga parokya ang motabang.

Samtang 700 ka mga Persons with Disabilities ang motabang isip volunteers ning nagsingabot nga bugnong lugaynon sumala pa ni John Paul Maunes, ang chief executive officer sa Philippine Accessible Deaf Services nga nahinabi sa Banat News. Matud pa ni Maunes sa lungsod sa Cordova adunay mga sakop sa PWDs ang apil sa 3rd member atol sa adlaw sa eleksyon ang gitahas kanila mao ang tigputol sa mga ballota.

Sumala pa ni Maunes, pilot area ang Cordova alang sa pipila ka mga sakop sa PWDs nga nahimong 3rd member kauban ang Board of Election Inspector.

Gitug-an ni Maunes, atol sa adlaw sa piniliay ipakatap usab sila sa pito ka mga lugar nga naglangkob sa Dakbayan sa Lapu-Lapu, Mandaue, Cebu City, Talisay ug ang mga lungsod sa Cordova, San Remegio ug Bantayan (BANAT NEWS)