“Karnaper” gikaligo og bala

CEBU, Philippines - Gipauwanan og bala ang usa ka gipasanginlang notadong karnaper sa siyudad sa Talisay diha sa Sitio U.P. Lot Kalmar, Brgy. Lawaan I kagahapon sa kaadlawon.

Ang biktima naila nga si Jesrich Arradaza, 26, temporaryong nagpuyo sa Barangay Mohon sa nahisgutang siyudad ug lumad nga taga Buhangin, Butuan City, Agusan Del Norte.

Si Superintendent Germano Mallari, hepe sa kapulisan sa maong siyudad  nagkanayon nga nagmaneho sa iyang itom nga Honda-XRM nga motorsiklo ang biktima nga adunay temporaryong plaka nga IJ8200 nga adunay kolor nga itom.

Giingong gisundan kini og upat ka lalaking nagsakay usab sa duha ka motorsiklo ug pag-abot sa nahitaboan, ang mga angkas nagdungan sa pagpusil sa biktima sa makadaghang higayon.

Naigo sa iyang ulo, dughan, kamot, buko-buko ug sa uban pang parti sa iyang lawas si Arradaza ug daling gibiyaan sa mga mamumuno. Ang mga nirespondeng mga pulis nakarekober og duha ka empty shell sa .45 nga bala, tulo ka empty shell sa .9mm nga bala, deformed slug ug ang motor sa biktima diha sa crime scene.

Matud pa ni Mallari ang biktima adunay record sa ilang buhatan ug ilang gipangita tungod sa kasong pagpangawat og motor. (BANAT NEWS)