Presidential debates nagkainitay

CEBU, Philippines - Nahimong mainiton ang Visayas Leg sa presidential debate kagahapon nga gihimo sa University of the Philippine-Cebu ug gilauman nga kapunitan og pagtulon-an sa mga botante aron makapili og kandidato nga angayang molingkod sa pagkapangulo sa nasud sa mosunod nga unom ka tuig.

Sa unang round pa lang nagkainitay na ang mga kandidato sama sa isyu bahin sa mga kaso ni Binay, ang pagka-Pilipino ni Senadora Grace Poe, ang isyu bahin sa kung unsaon pagsulbad ni Davao City Mayor Rodrigo Duterte ang krimen sud sa unom ka buwan ug ang pasangil sa mayor kang Roxas nga pagka-bakakon bahin sa edukasyon niini ug sa isyu bahin sa illegal nga drugas didto sa Davao City.

Adunay mga panelists nga nangutana direkta sa usa ka kandidato ug hatagan usab og kahigayonan ang ilang mga kaatbang pagtubag o pagkomento sa tubag sa pangutana.

Si Duterte misaway ni Roxas sa pag-ingon nga "pretentious" leader  dihang nangangkon ang naulahi nga sa dihang siya pay kalihim sa DILG nakasakmit sila og balor P7.5 bilyones nga drugas.

Matud pang Duterte dili tinuod ang pangangkon ni Roxas ug gani di tinuod ang iyang educational background.  "Pati 'yung edukasyon mo, sinali mo. Hindi ka pala taga-Wharton," matud pang Duterte.

Apan si Roxas misumbalik kang Duterte sa pag-ingon nga mismo ang Wharton mikompirmar nga gradwado nila si Roxas apan dili lang gyud gusto ni Duterte nga moangkon nga tinuod kini.

“Kung ayaw maniwala ‘yan ang brand ng ‘Duterte justice.’ Kung ano ang nasa isip niya kahit hindi totoo ‘yan ang kanyang papaniwalaan at ‘yan ang kanyang gagawin,” matud pang Roxas.

Samtang sila si presidential candidates  Binay ug Poe nagkainitay usab bahin pa lang sa ‘rule of law’ nga nisangpot sa isyu bahin sa  citizenship sa senadora.

Si Binay gipangutana kun unsay iyang buhaton kun ang nataktak niyang anak nga si Makati City Mayor Jejomar Erwin “Junjun” Binay Jr. makombikto sa kasong giatubang niini nga pagpangawkaw.

Si Binay miingon nga mosunod siya sa rule of law ug iyang pasagdan ang anak nga atubangon ang kaso. “Kung ano man ang desisyon susundin natin. We must live a government with a rule of law,” matud pang Binay.

Apan gisanta siya ni Poe sa pagkuwestiyon sa iyang tubag bahin sa rule of law, tungod kay matud pa ni Poe nga ang manag-amahang Binay nagmagahi naman gani pagtambong sa hearings bahin sa kasong kurapsiyon diha sa Senado.

“Bigyan na natin ng benefit of the doubt ang ating vice presidebt siguro nga mali ang nasabi nito pero para sakin importante na sana nakadalo siya sa Senado para mag-eksplika kung wala naman siyang tinatago,” dugang pa niya.

Diha na nisunod ang pagpika ni Binay bahin sa citizenship ni Poe nga giisip niyang paglapas sa rule of law.

“Alam mo Madame Senator, pinag-uusapan natin ang rule of law ha, lagi mong sinasabi na ikaw ay tunay na Pilipino, paano ka magiging tunay na Pilipino kung sumumpa ka na maging Amerikano at mag-aabroad ka, ikinahihiya mo ang pinanggalingan mo?”matud pang Binay.

Hinuon gawas sa ilang personalay nga pagatake sa usa’g-usa, ang upat ka mga kandidato nahatagan og higayon nga makawadwad sa ilang mga plano.

Ang mga organizers nga nipasiugda niini mao ang Commission on Elections, TV5, ug The Philippine Star Media Group daan nang nisaad nga “debate gyud” ang mahitabo ug ang katawhan na lang nga nitan-aw sa live telecast maoy mag-igo kun nahatag ba ang gisaad sa mga organizers.

Nalangan og usa ka oras  ug tunga ang debate  human mireklamo ang kampo ni  kanhi Interior Secretary Mar Roxas batok ni Vice President Jejomar Binay tungod sa pagdala niini og mga dokumento diha sa debate tungod kay mao kini ang gikasabotan.

Apan miinsister niini si Binay tungod kay matud pa niya wala’y kalainan ang pagdala niya og dokumento sa pagpangandam usab nga gihimo sa iyang mga kaatbang.

Hinuon human sa kapin usa ka oras nga diskusyon nakasugod na ang pormal nga debate. (BANAT NEWS)