KMK Transport mobiyahe sa Galleria

CEBU, Philippines - Gusto’ng mopadagan og mga bus ang Cebu City KMK Transport Corporation alang sa bag-ong abli nga Robinsons Galleria Cebu.

Tungod niini si KMK Transport Corporation president Richard Caburcos nihangyo sa kagamhanan sa Dakbayan sa Sugbo nga moduso sa plano sa Land Transportation Franchising and Regulatory Board.

Sa Pebrero 2 nga suwat ni Caburcos ngadto ni Konsehal Nestor Archival, kini niingon nga gitambagan sila sa LTFRB nga mokuha og endorsement sa City Hall sa panginahanglan sa High Quality Bus Service sa mao’ng lugar.

Kung maka-endorso ang siyudad, ang LTFRB mohatag og Certificate of Public Convenience ngadto sa Cebu City KMK Transport Corporation aron makadugang kini og units ug makahatag og dugang serbisyo sa north ug south sa siyudad.

Sa pagkakaron, adunay existing nga CPC ang KMK alang sa Naga City, Minglanilla ug Talisay City padulong sa SM City Cebu.

Si Archival, chairman sa committee on transportation sa konseho, nagtakda og executive session karong Pebrero 17.

Lakip sa mga giimbitar ang mga opisyal sa Cebu City Transportation Office, transport groups, KMK ug ang tagdumala sa Robinsons.

Sa niagi’ng tuig, nihangyo ang Robinsons nga maapilan sa rota sa My Bus System sa SM Seaside City Cebu ang ila’ng bag-ong mall.

Matud ni Caburcos nga andam sila mobutang og bus service padulong ug gikan sa San Fernando sa habagatan ug gikan sa Compostela sa amihanan.

Nagkaestorya na sila’ng Caburcos ug si Floramie Vega, regional operations manager sa Robinsons sa plano.

Gibutyag ni Vega nga andam sila makig-estorya sa KMK sa mao’ng plano. (BANAT NEWS)