Presyo sa buwak nagkamahal na—flower vendor
CEBU, Philippines - Valentine’s Day, adlaw sa mga naghinigugmaay ug sa mga pamilya nga puno sa gugma.Usa sa labing dali kaayong mahatag ngadto mga minahal mao ang bulak ug chocolates bisan unsa pa kini kamahal. Tuyo nga gisuroy sa Banat News ang pipila ka mga flower shops sa may dalan Pelaez ning Dakbayan sa Sugbo.
Matud pa ni Mergie Monteclar, usa sa mga nanag-iya og pwesto sa bulak nga sa pagkakaron daghan na ang nagpa-book og mga bouquet kay mahadlok og mahutdan tungod kay sa nilabay nga tuig nagkulang gayud ang suplay bulak.
Sumala pa ni Monteclar, abunda karon sa bulak kay pwede man sila mokuha og bulak gikan sa Baguio City ug Davao City kung mahutdan dinhi sa Sugbo.
Apan bisan sa kaabunda basta ingon niini nga mga okasyon aduna gayuy pagsaka sa presyo tungod kay siguro sa tan-aw sa mga nagnegosyo niini, way kantidad ang paghatag sa iyang minahal.
Ang presyo sa tulo ka rosas P300, kung unom P600, kun usa ka dosena P1,000, kung adunay Teddy Bear nga usa ka dosenang rosas P1,500; usa ka dosenang chocolate nga dunay Teddy Bear P1,500. Si Monteclar miangkon nga matag Valentine’s Day dako gyud ang ilang kitaon. Matud niya, iyang nasabtan sa kadugay na niya pagpamaligya og buwak nga “loving and caring” gyud ang mga Sugbuanon. (BANAT NEWS)
- Latest
