Mock elections himuon

CEBU, Philippines - Ang Comelec mopahigayon og mock elections karong adlawa (Sabado) sa nagkadaiyang mga dapit sa nasud lakip na dinhi sa Sugbo agi og pagpangandam sa 2016 nga eleksiyon sa umaabot nga buwan sa Mayo.

Ang mock elections himuon sa Dakbayan sa Sugbo ug anha ipahigayon sa Mabolo Elementary Schoo ug Lusaran Elementary School ug sa lungsod sa Santander nga anha ipahigayon sa Cabutongan Barangay Hall.

Sa maong mock elections 100 ka registered voters ang paapilon niini lakip na niini ang mga Persons With Disability (PWDs) ug senior citizens. Ang Comelec magbutang og vote counting machines ug dunay mga Board of Election Inspectors (BEI) ug ang resulta ilang i-transmit ngadto sa municipal canvassing dayon ngadto sa provincial ug didto sa national Comelec Office.

Si Provincial Comelec Election Officer, Ferdinand Gujilde nagkanayon nga tumong sa mock election mao ang pagsuta kun mogana ba og tarong ang mga makina nga gamiton ug labaw sa tanan buot nila nga ipakita sa katawhan nga kasaligan ang mga gigamit nga makina sa piniliay.

Usa niini masuwayan kung ang balota nga dunay buslot dawaton o iapil ba kini og ihap sa makina.

Matud ni Gujilde nga dunay buhaton usab nga manual nga pag-ihap sa balota ug itandi kini ngadto sa resulta gikan sa makina.

Nunot niini, ang Information and Technology Department sa Comelec moprinta sa Election Day Computerized Voters Lists alang sa eleksiyon lakip na sa Posted Computerized Voters Lists alang sa mock elections.     

Sa laing bahin, ang ubang mga residente sa dakbayan sa Mandaue dili uyon sa gisugyot nga mall voting human sa gihimong public hearing sa milabay’ng adlaw diha sa Pacific Mall, nga diin 41 lang ang mitambong sa mokabat 6,000 ka registered voters sa maong dapit.

Samtang diha sa Insular Square Mall, sa kapin sa 2,000 nga botante 50 lang ang mitambong ug mayoriya kanila ang supak sa mall voting.

Ang maong mga misupak nagkanayon nga layo ang mall ug mogasto pa sila og pamelete itandi kung anha sa mga eskuylahan sa duol sa ilang mga balay.

Si Gujilde nagkanayon nga ang nahisgutang sentimiyento sa mga mitambong sa public hearing usa kini sa ilang timbangtimbangon kung ipadayon o dili ang mall voting. Kun sa malls kini himuon, hamugaway ug bugnaw apan kung layo kini sa kinabag-an sa rehistradong botante di niini matuman ang tumong nga paghatag og kasayon ug kahamugaway sa pagbotar sa mga botante. (BANAT NEWS)