Rama di pa moduso og supplemental budget

CEBU, Philippines - Wala pa'y desisyon ang executive department sa kagamhanan sa Dakbayan sa Sugbo kun moduso og laing supplemental budget aron pagbayad sa utang sa South Road Properties.

Si Konsehal Margarita “Margot” Osmeña ang nihangyo sa laing supplemental budget alang  sa pagbayad sa amortization sa utang sa SRP ngadto sa Japan International Cooperative Agency (JICA).

Kini tungod kay wala’y gigahin ang executive department nga pundo alang sa pagbayad sa utang karong tuiga.

Apan si City Administrator Lucelle Mercado nagkanayon nga nag-agad pa sila kang M0ayor Michael Rama. Una na nga niingon si Rama nga kahibawo na ang konseho sa angay buhaton.

Buot ni Rama ug sa executive department nga dili lang ang amortization ang bayran apan ang kinatibuk-an nga P2.3 bilyones nga utang.

Nalangan ang pagpasar sa SB-1 tungod sa kaso nga gipasaka ni Romulo Torres sa pagkuwestiyon sa paggamit sa halin sa luna sa SRP.

Matud ni Rama nga kung buot gyud nga bayaran ang utang sa SRP, giaprobahan na unta ang SB-1.

Si Mercado nibutyag nga adunay plano nga imbitahon sila sa konseho aron hisgutan ang pagduso sa bag-ong SB.

Apan matud ni Mercado nga bisan imbitahon sila sa konseho ug sa local finance committee, mag-agad sila sa mando ni Rama. (BANAT NEWS)