Duha ka Cebuano tabloids ipatawag sa CAIB

CEBU, Philippines - Gikatakdang ipatawag sa Cebu City Anti Indecency Board (CAIB) ang mga tagdumala sa tabloids dinhi sa Sugbo kalabot sa kampanya niini batok sa mga malaw-ay nga  unod sa mga basahon.

Kini maoy gibutyag ni Lucelle Mercado, ang chairman sa CAIB human nga matud pa aduna silay nabantayang matud pa malaw-ay nga sugilanon sa maong mga basahon.

Ang CAIB nag-monitor sa mga basahon, pasundayag sa telebisyon ug radio batok sa mga malaw-ay basahon, drama o pasundayag nga alang kanila makapukaw sa hunahuna sa tawo ilabi na sa mga kabatan-onan.

Ang Banat News mipadayag sa kaandam pagtubag sa CAIB sa gusto nilang masayran kabahin sa mga basahong gimantala niini. Kini miklaro nga ang gimantalang mga sugilanon ug nobela dili intensyong tintalon ang hunahuna sa bumabasa kondili ang pagpahisgot sa mga panghitabo sud sa usa ka pamilya.

“We have not received CAIB's invitation to meet but we are very much open to discuss with them their concerns about the Banat News series. It is never our intention to publish lewd articles. The Mga Eba sa Paraiso ni Adan is a story that tackles family issues and is definitely not smut. We, however, are open to CAIB's ideas for the series," matud pa ni Banat News Editor in Chief Quennie Bronce.

Samtang ang Superbalita Cebu mipadayag nga nagsubay sila sa mga pamalaod sa pagmantala og basahon.

“Kami sa Superbalita Cebu nagmatngon sa mga balatian sa among mga magbabasa ug nagsubay usab kami sa mga batakan sa maayong pamantala, " matud pa sa Editor in Chief niini nga si Michelle So.

Dili kini maoy unang higayon nga gipatawag ang mga kadagkoan sa maong mga basahon tungod kay kaniadto nahimo na kini ug nituman sila sa gipangayo sa CAIB.

Gawas sa mga tabloid apil na usab nga gipahimangnoan sa CAIB mao ang mga radio nga magbantay usab sila sa ilang mga programa nga dili masagolan og mga malaw-ay nga pasundayag. (BANAT NEWS)