Davide magpatawag og tigom sa MCBMB

CEBU, Philippines - Mopatawag og tigom sa sunod semana sa mga sakop sa Mactan-Cebu Bridge Management Board (MCBMB) si Gob. Hilario Davide III nunot sa mga problemang nasugatan sa pag-ayo sa Mandaue-Mactan Bridge.

Si Ethel Natera, Provincial Information Officer (PIO) mibutyag nga ang sentro nga tukion sa maong meeting ang kabahin sa epekto sa pag-ayo sa nahisgutang tulay. Nasayran nga nalangan bisan ang hingpit nga pagsira sa taytayan tungod kay dili makasugod sa trabaho ang Department of Public Works and Highways kun dili lihukon sa Metropolitan Cebu Water District (MCWD) ang ilang mga tubo sa tubig.

Gawas sa MCWD, diha usab nagkutay ang linya sa 69,000 kilovolts nga kuryenteng suplay sa East Asia Utilities Corporation diha sa Mactan nga kinahanglan usab nga ipahimutang sa dili pa ang pagsugod sa repairs sa maong taytayan.

Tungod sa maong mga nakitang problema gipanglantawan nga maapektahan usab niini ang negosyo ilabi na diha sa Mactan Export Processing Zone (MEPZ) , mga residente sa isla, Dakbayan sa Mandaue ug Cebu ug labaw sa tanan ang airport.

Niining ulahi lang daghan kaayo ang reklamo sa grabeng kahuot sa trapiko diha sa lugar diin kadtong gikan sa Cebu City nga mopaingon sa airport maabtan og upat ka oras una pa maabot sa tugpahanan. Ang mga gikatakdang motambong sa tigom gilangkuban sa MCWD, Mactan Electric Company, Visayan Electric Company (VECO), East Asia, Mactan Airport Authority, GMR Megawide Cebu Airport Corporation, National Grid Corporation of the Philippines (NGCP), Department of Public Works and Highways ug ang contractor sa construction.

Kagahapong adlawa, nakigtagbo si 6th District Congressman Luigi Quisumbing sa DPWH-7, TEAM  ug sa Mandaue Chamber of Commerce and Industry aron pagtuki labot sa problema sa trapiko sa siyudad. Si Girlie Garces sa MCCI miingon nga nakaapektar na sa ilang mga trabahante ang problema sa trapiko kay pwerteng daghana ang pirme mauwahi og abot sa trabaho.

Hinuon, si Glenn Antigua, pangu sa TEAM miingon nga nasabutan nila sa CTMS sa Lapu-Lapu nga gikan sa alas 4 sa kaadlawon ngadto sa alas 2 sa hapon tugotan makaagi ang mga sakyanan gikan sa Lapu-Lapu paingon sa Mandaue ug sa alas 2 sa hapon hangtod sa alas 4 sa hapon ang gikan sa Mandaue paingon sa Lapu-Lapu na usab ang makaagi sa giayo nga taytayan.

 Si Engineer Renult Ricardo sa 6th Engineering District sa Department of Public Works and Highways miingon nga kuyaw gyud nga adunay sakyanang matanggong sa taytayan tungod sa traffic kay bug-at kini ug peligro alang sa tanan.  (BANAT NEWS)